Лидерката на француската крајна десница Марин Ле Пен води во најновата анкета на јавното мислење пред претседателските избори закажани за пролетта 2027 година. Истражувањето на агенцијата „Толуна Харис Интерактив“ покажува дека Ле Пен освојува помеѓу 33 и 36 проценти од гласовите во првиот круг, оставајќи ги зад себе претставниците на левицата и политичкиот центар, во услови кога Емануел Макрон нема уставно право на нов мандат.
Истражувањето спроведено меѓу 8 и 10 септември покажува јасна доминација на лидерката на Националниот собир (RN). Со поддршка од 33 до 36 отсто од гласачите, Ле Пен е сигурен патник во вториот круг без оглед на комбинацијата на противкандидати.
Нејзината предност доаѓа по континуираниот раст на десницата на последните парламентарни избори и сериозната фрагментација на владејачкото мнозинство.
Лидерот на радикалната левица Жан-Лик Меланшон, на чело на движењето „Непокорена Франција“, според анкетата влегува во вториот круг во три од вкупно пет тестирани сценарија. Во сите тие директни дуели, проекциите покажуваат убедлива победа на Ле Пен.
Политичкиот центар, кој со години го градеше актуелниот претседател, тешко наоѓа единствен наследник. Единствениот кандидат од десниот центар со конкурентен рејтинг е поранешниот премиер Едуар Филип, кој во само едно сценарио успева да избие пред Меланшон, додека во друго е целосно изедначен со него. Сите останати потенцијални кандидати од центристичкиот блок завршуваат значително под водечкиот тандем.
Првиот круг од претседателските избори ќе се одржи на 18 април, а вториот на 2 мај 2027 година. Бидејќи уставот му забранува трет последователен мандат на Макрон, француската политичка сцена влегува во длабоко превирање.
Подемот на Ле Пен во Франција носи директни реперкусии и за надворешната политика на земјата. Париз е еден од двата главни столба на политиките на Европската унија за проширување кон Западен Балкан, па евентуална промена на власта во Елисејската палата со антиестаблишмент опција ќе го забави евроинтегративниот процес и ќе ги засили барањата за внатрешна реформа на Унијата пред нов прием на земји.
