Трагите од кокаин што ги загадуваат реките и езерата можат да се акумулираат во мозокот на лососот и да го нарушат нивното однесување, предупредуваат истражувачите, додавајќи дека последиците за популациите на риби сè уште не се јасни.
Научници од Шведскиот универзитет за земјоделски науки утврдиле дека млад атлантски лосос, изложен на кокаин и неговиот главен производ на разградување бензоилекгонин, пливал подалеку и се ширел низ езерото во поголема мера од контролната група. Резултатите се објавени во списанието Current Biology.
Во рамки на студијата, рибите биле пуштени во езерото Ветерн во Шведска и следени со акустични предаватели во период од два месеца. Истражувачите забележале дека изложените единки не само што биле поактивни кон крајот на студијата, туку и навлегувале подалеку во езерото.
Особено значајно е што најсилен ефект не покажал самиот кокаин, туку бензоилекгонинот, метаболит што во природата често се јавува во повисоки концентрации. Во последните две недели од следењето, рибите изложени на кокаин пливале околу пет километри повеќе од контролните, а оние изложени на метаболитот дури и до 14 километри повеќе.
Научниците предупредуваат дека ваквите промени можат да влијаат врз тоа каде рибите се хранат, колку енергија трошат и колку се изложени на предатори. Но, тие нагласуваат и дека сè уште треба да се утврди дали истите ефекти се случуваат и кај риби што природно се изложени на овие загадувачи во дивина.
