Четвртина од средношколците на возраст од 15 и 16 години во Северна Македонија се коцкале за пари во изминатата година, покажуваат податоците од националното истражување ЕСПАД 2024. По повод Меѓународниот ден на младите, 12 август, ХЕРА Млади и Иницијативата „Фрли ја коцката!“ организираа герила-акција во Скопје, барајќи итни мерки за заштита на младите од сè поприсутната нормализација на коцкањето и обложувањето.
Националното истражување ЕСПАД 2024 открива дека 25% од учениците на возраст од 15 до 16 години се коцкале за пари во последните 12 месеци. Оваа појава е поизразена кај момчињата (34%) во споредба со девојчињата (16%).
Уште позагрижувачки е фактот што уделот на проблематично коцкање кај оваа популација се зголемил од 4,5% во 2019 година на 7,6% во 2024 година.
Младинската невработеност кај лицата од 15 до 29 години изнесува 23,6%, додека податоците од Студијата за млади на Фондацијата „Фридрих Еберт“ покажуваат дека 45,3% од вработените млади не работат во струката. Дополнително, дури 67,7% од младите изразуваат желба за иселување поради нискиот животен стандард, корупцијата и недостатокот на можности.
Активистите предупредуваат дека во вакви услови, агресивното рекламирање на казина, обложувалници и онлајн платформи создава опасна илузија за лесен излез од финансиските проблеми.
Светската здравствена организација посочува дека последиците од коцкањето надминуваат само финансиски загуби и вклучуваат нарушени социјални односи, депресија, анксиозност и зголемен ризик од суицидалност.
Истражувањата на Универзитетската клиника за психијатрија во Скопје покажуваат дека речиси 30% од адолесцентите во земјата се соочуваат со умерени до тешки депресивни симптоми, а 42,1% со анксиозност, што го прави преклопувањето со коцкањето дополнително ризично.
ХЕРА Млади и „Фрли ја коцката!“ упатија пет клучни барања до институциите:
- Доследна контрола и почитување на оддалеченоста на објектите за коцкање од училиштата.
- Строга забрана и контрола на рекламирањето, посебно на интернет и социјалните мрежи.
- Ефикасна верификација на возраста за да се спречи онлајн коцкање на малолетници.
- Вклучување на финансиската писменост и превенцијата од зависности во образовниот систем.
- Бесплатни и доверливи услуги за психолошка поддршка за млади кои се соочуваат со зависност.
Младите порачаа дека наместо илузија за брза добивка, им се потребни квалитетно образование, сигурни работни места, културни содржини и достапна здравствена поддршка.
