Од 30 септември до 4 октомври, АКТО ќе донесе перформанс, изложба, предавање, работилници и заедничко готвење во Скопје. Во фокусот е прашањето како Киното во Железничката зграда повторно да стане простор за јавна култура и заедницата.
По дваесет изданија, АКТО се развива како платформа за современа уметност и едукација, задржувајќи го името и формата на фестивал. Годинава, неговата програма се гради околу Киното во Железничката зграда – простор што организаторите го истражуваат и активираат повеќе од една деценија.
За АКТО, киното е место во кое уметниците, студентите, архитектите, жителите и другите учесници можат заедно да размислуваат за иднината на јавниот простор. Во текстот со кој го најавува изданието, Филип Јовановски го нарекува „простор за поминување време заедно“ и лабораторија за истражување на градот.
Програмата започнува во среда, 30 септември, во 20 часот, со перформативниот радиоесеј „Железничарот на крајот на светот“ во Киното во Железничката зграда. Делото ја води публиката низ историјата на железничарските и синдикалните борби, уметничките движења и политичките превирања од 1896 до 2026 година. Автор на концептот е Филип Јовановски, а изведувачка е Мартина Даниловска.
Од 1 до 3 октомври, во киното ќе се одржува Лабораторијата за перформативно просторни практики „Градот како сцена“, со учество на студенти од Скопје и Нови Сад. На 1 октомври во 19 часот, во амфитеатарот на Архитектонскиот факултет, архитектот и сценограф Радивоје Динуловиќ ќе одржи јавно предавање, „Semper Idem… or it is not?“, за односот меѓу архитектурата, театарот и политичкиот отпор.
Во петок, 2 октомври, во галеријата „Драгутин Аврамовски – Гуте“ во Сули-ан ќе се претстават финалистите за XX награда ДЕНЕС 2026: Јован Јосифовски, Сергеј Калеников и Ана Трајковска. Нивното претставување и разговорот со жирито се закажани за 12 часот, а изложбата и доделувањето на наградата ќе започнат во 20 часот. Наградата е наменета за млад визуелен уметник или уметница до 35 години и ја организира Факултетот за работи што не се учат – ФРУ. Вечерта во програмата е и диџеј-сет на Мартина Пенева.
Фестивалот ќе заврши во недела, 4 октомври, од 12 до 16 часот, со „Бистро на еден ден“ кај Киното во Железничката зграда. Настанот обединува заедничко готвење, детска ликовна работилница, кафе, музика во живо и винил диџеј-сетови. Ќе настапат Хана Корнети, DJ Чваре и Шеф Шеф, а децата и родителите на работилницата „Креативна игра“ ќе создаваат заеднички „Град од соништата“.
Преку овие настани, АКТО ја продолжува работата на оживување на киното и го отвора прашањето како просторот во Железничката зграда може повторно да служи за култура, учество и средби на заедницата.
