Српскиот сатиричар Зоран Кесиќ по 13 години остана без телевизиски простор за емисијата „24 минути“, откако новите сопственици на телевизијата Нова С го раскинаа договорот. Во интервју за хрватскиот портал Индекс, Кесиќ објаснува дека преселбата на Јутјуб не е случајна токму во период кога во Србија се најавуваат превирања и парламентарни избори. Сатирата според него не престанува, туку се прилагодува на цензурата.
Новата сезона на „24 минути“ стартува директно на Јутјуб, наместо во досегашниот термин на телевизијата Нова С. Раководството на компанијата Адрија њуз нетворк, по неодамнешното преземање од страна на португалскиот фонд Алпак капитал, одлучи да не го продолжи договорот. Официјалното образложение од менаџментот гласеше дека продукцијата генерира превисоки трошоци и слаб комерцијален ефект за програмата.
Кесиќ ги отфрла таквите тврдења како неточни. Според него, емисијата постојано носеше висока гледаност и привлекуваше спонзори и покрај стравот кај домашните компании да се рекламираат во критички настроена содржина. Зад финансиските изговори, тврди авторот, се крие намерата на власта да ги замолчи критичките гласови во медиумите под контрола на нови сопственици.
Авторот оценува дека мотивот за отстранување на емисијата лежи во нервозата на владејачките структури пред претстојните политички одлуки и избори. Сатирата, според неговото искуство, успеваше да ги разобличи манипулациите на власта преку директно потсмевање со нивните изјави и потези.
„Кога автократски систем влегува во фаза на слабост, секоја аргументирана шега му изгледа како сериозна закана“ вели Кесиќ.
Тој посочува дека со притисокот врз независните медиуми власта сака да обезбеди целосна контрола врз јавниот простор, но публиката веќе научи каде да ги бара информациите.
„Преселбата на интернет платформата не значи намалување на интензитетот, туку целосна независност од телевизиските шеми и договори. Тимот зад емисијата продолжува да работи во истиот состав, потпирајќи се на директната поддршка од гледачите и претплатниците од целиот регион“ вели Кесиќ.
Тој смета дека новите околности само ја зацврстуваат нивната врска со публиката во Србија и регионот.
