Каде најмногу сакаат да работат луѓето? Ова се 100-те компании на листата на „Форбс“ за 2026

„Мајкрософт“, „Делта Ерлајнс“ и „Шопифај“ се на врвот на годишната листа на „Форбс“ и „Статиста“, составена врз основа на анкета со повеќе од 300.000 вработени.

01/10/2026
07:47
Глобал
Редакција Трн
Следи го Трн на Google

Само еден од пет вработени во светот вели дека е вистински ангажиран на своето работно место, додека четири од 10 секојдневно чувствуваат значителен стрес, покажува истражувањето „Состојба на глобалното работно место 2026“ на „Галуп“.

Во таков контекст, „Форбс“ и истражувачката компанија „Статиста“ и годинава објавија листа на компании кои, според оценките на вработените, се издвојуваат како атрактивни работодавци. Истражувањето опфатило повеќе од 300.000 вработени во над 50 земји. Испитаниците ги оценувале работодавците според повеќе критериуми – платата и бенефициите, можностите за напредување, рамнотежата меѓу работата и приватниот живот, репутацијата на компанијата, како и подготвеноста да ја препорачаат компанијата на други.

Во изборот можеле да учествуваат компании со најмалку 1.000 вработени и меѓународно присуство. Испитаниците можеле да ги оценуваат и поранешните работодавци, како и компании за кои имале информации преку своето познавање на индустријата или преку блиски лица.

Резултатите биле обработени преку систем на бодување што ги зема предвид податоците од последните три години, при што поголема тежина имале поновите резултати и оценките на актуелните вработени.

Вкупно 900 компании со седиште во 52 земји се најдоа на пошироката листа за 2026 година.

Кои компании се најдоа во топ 10?

На првото место се најде американскиот технолошки гигант „Мајкрософт“. Втора е американската авиокомпанија „Делта Ерлајнс“, додека третото место му припаѓа на канадскиот технолошки гигант „Шопифај“. На четвртата позиција е американскиот малопродажен синџир „Костко“, а петта е технолошката компанија „НВДИЈА“.

Следуваат „Адоб“, „Епл“, јапонската „Сони Груп“, „Алфабет“ – матичната компанија на „Гугл“ – и „Лего Груп“.

Технологијата доминира, но не е единствена

Меѓу компаниите во првите 20 се и „Нинтендо“, „Ролекс“, „Ај-Би-Ем“, „Ербас“, „БМВ Груп“, „Сан Мигел“, „Сиско“, „Фиделити Инвестментс“, француската „Атлантска група“ и „ЏејПи Морган Чејс“.

Во првите 50 се наоѓаат и „Спотифај“, „Локхид Мартин“, „Ролс-Ројс Холдингс“, „Селсфорс“, „Самсунг Електроникс“, „Американ Експрес“, „Мериот Интернешнл“, „Шанел“, „Најк“, „Тојота Груп“, „Рош Холдинг“, „Бош“, „Ели Лили“, „САП“, „Хајат Хотелс“, „Хилтон“, „Мишелин Груп“, „Дел Технолоџис“, „Лореал“ и „Сименс“.

Во поширокиот топ 100 се најдоа и „Фолксваген Груп“, „Проуктер енд Гембл“, „Ново Нордиск“, „Интел“, „Борингер Ингелхајм“, „Фор Сизонс Хотелс енд Рисортс“, „Сауди Арамко“, „Адидас“, „Новартис“, „Шнајдер Електрик“, „Нетфликс“, „Фајзер“, „ЛВМХ“, „Гармин“, „БАСФ“, „Хајнекен“, „Икеа“ и „Оракл“.

На листата се појавуваат компании од различни сектори – од технологија и финансии, преку автомобилската и фармацевтската индустрија, до туризмот, трговијата и производството.

Важно е да се напомене дека листата претставува резултат од конкретно истражување и методологија на „Форбс“ и „Статиста“, а не универзално мерење на условите за работа во секоја од компаниите. На неа влијаат перцепциите на испитаниците, нивното искуство и критериумите вклучени во истражувањето.