Истражната комисија на Обединетите нации за Сирија алармираше дека израелските операции во јужниот дел на земјата стануваат постојани и можат да претставуваат воени злосторства. Во извештајот презентиран пред Советот за човекови права во Женева се документирани апсења на десетици цивили и нивно префрлање преку граница, како и поставување фиксна воена инфраструктура. Израелските власти ги отфрлија наодите, тврдејќи дека станува збор за политички мотивирана иницијатива.
Израелските сили на теренот редовно изведуваат пешадиски упади, патроли, рации и претреси на куќи што директно го загрозуваат секојдневниот живот на локалното население. Комесарката Фионуала Ни Аолаин, презентирајќи го извештајот во Женева, посочи дека овие воени активности во јужните провинции Кунеитра и Дара добиваат карактер на трајно воено присуство.
На теренот се регистрирани постојани контролни пунктови и инженерски зафати со кои се утврдуваат позициите на израелската армија длабоко во сирискиот пограничен појас.
Според прецизните податоци на Комисијата, израелската војска на сириска територија до јуни лишила од слобода 49 сириски државјани, меѓу кои и две деца. Истражителите на ОН наведуваат дека притворените лица се префрлени преку границата на територијата на Израел.
„Ваквите постапки можат да претставуваат воени злосторства“, рече Ни Аолаин пред претставниците на земјите членки на Советот.
Посебна загриженост предизвикува фактот што дел од притворените се држат во целосна изолација, без контакт со семејствата или правни застапници, што отвора основан страв од малтретирање и тортура. Дел од локалното население веќе ги напуштило своите домови поради честите воени дејствија.
Дипломатската мисија на Израел при Обединетите нации во Женева ги отфрли обвинувањата од извештајот, нарекувајќи ја седницата организирана политичка кампања.
Официјален Тел Авив тврди дека нема територијални претензии кон Сирија. Според нивното образложение, военото распоредување е строго ограничено на привремена тампон-зона што зафаќа приближно 0,1 процент од сириската територија, а целта на операциите е исклучиво заштита на сопствената безбедност од вооружени закани долж пограничната линија.
