Италија ја продолжи за уште 15 дена привремената суспензија на Шенгенските правила во однос на Шпанија, соопшти италијанското Министерство за внатрешни работи. Рим како причина ги наведува проценките за ризици по внатрешната безбедност и можни закани поврзани со инфилтрација на терористички организации.

Одлуката значи дека привремените контроли на границата меѓу двете земји продолжуваат и покрај тоа што и Италија и Шпанија се дел од Шенгенскиот простор. Италија првпат ја воведе мерката на 31 јули, по зголемениот миграциски притисок поврзан со пристигнувањето мигранти од Мароко во шпанската енклава Сеута во Северна Африка.

Сеута се наоѓа на северниот брег на Африка и е под шпанска управа, а поради нејзината географска положба претставува една од точките преку кои мигрантите се обидуваат да влезат на територијата на Европската Унија. Италијанските власти при продолжувањето на мерката повторно се повикуваат на безбедносни ризици, оценувајќи дека условите поради кои биле воведени контролите сè уште постојат.

Привременото враќање на граничните проверки е дозволено според правилата на Шенгенскиот простор во случаи кога земјите проценуваат дека постои сериозна закана за јавниот ред или внатрешната безбедност.