Rock and Roll Hall of Fame ја објави генерацијата за 2026, а меѓу новите членови се Iron Maiden, Oasis и Wu-Tang Clan, заедно со Phil Collins, Billy Idol, Joy Division/New Order, Sade и Luther Vandross. Церемонијата на влегување е закажана за 14 ноември во Peacock Theater во Лос Анџелес, а телевизискиот пренос треба да биде емитуван во декември на ABC и Disney+.
Годинава имало 17 номинирани изведувачи, што е најголем број досега, а во главната изведувачка категорија беа избрани осум имиња. Меѓу номинираните кои овојпат не влегоа се Mariah Carey, Jeff Buckley, Lauryn Hill, Shakira, P!nk, The Black Crowes, Melissa Etheridge, INXS и New Edition.
Ова е прво соло влегување за Phil Collins, кој веќе е дел од Hall of Fame како член на Genesis. Wu-Tang Clan и Luther Vandross биле избрани уште со првата номинација, додека Oasis, Iron Maiden и Joy Division/New Order влегуваат по повеќе обиди.
Покрај листата на изведувачи, Hall of Fame оваа година доделува признанија и во други категории. Early Influence Award ги добиваат Celia Cruz, Fela Kuti, Queen Latifah, MC Lyte и Gram Parsons. Musical Excellence Award оди кај Linda Creed, Arif Mardin, Jimmy Miller и Rick Rubin, додека Ahmet Ertegun Award му се доделува на Ed Sullivan.
Објавата предизвика дополнително внимание и поради долгогодишниот скептицизам на дел од новопримените музичари кон самата институција. Liam Gallagher и Bruce Dickinson претходно јавно го омаловажуваа Hall of Fame, но по објавувањето на резултатите Gallagher реагираше во свој препознатлив и ироничен стил, додека менаџментот на Iron Maiden порача дека бендот отсекогаш го ставал односот со фановите пред индустриските признанија, но дека сепак е убаво кога доаѓа вакво признание.
Со изборот на Oasis, Iron Maiden, Joy Division/New Order и Phil Collins, оваа генерација има силен британски печат, додека присуството на Wu-Tang Clan уште еднаш ја потврдува пошироката жанровска логика со која Hall of Fame одамна излезе од тесната рамка на класичниот рок.
