Иранскиот дневен весник „Хамшахри“, кој е близок до градските власти во Техеран, објави таканаречена „црна листа“ на личности кои ги смета за одговорни за смртта на врховниот лидер Али Хамнеи. На списокот се наоѓаат американскиот претседател Доналд Трамп, израелскиот премиер Бенјамин Нетанјаху, како и неколку европски лидери, меѓу кои и италијанската премиерка Џорџа Мелони.

Објавата следува по изјавата на Мојтаба Хамнеи, кој најави одмазда за смртта на својот татко, тврдејќи дека тој бил убиен во напад извршен од САД и Израел на почетокот на воениот конфликт.

Италијанските разузнавачки служби започнаа проверки за да утврдат дали содржината на „црната листа“ претставува официјален став на иранските власти или станува збор за редакциска позиција на весникот. Според италијанските медиуми, не е исклучена можноста иранскиот амбасадор во Италија да биде повикан на разговор.

„Хамшахри“ важи за медиум близок до администрацијата на Техеран, а неговата уредувачка политика е поврзана со конзервативното политичко крило предводено од градоначалникот Алиреза Закани. Весникот најчесто се обраќа до поконзервативниот дел од иранската јавност.

И покрај сериозноста на објавата, италијанската влада засега зазема претпазлив став. Според информациите на италијанските медиуми, Рим сака најпрво да утврди дали постои директна врска меѓу објавената листа и официјалниот ирански режим, бидејќи комуникациските канали меѓу двете земји засега остануваат активни.