Главниот ирански преговарач Мохамад Багер Калибаф изјави дека Соединетите Американски Држави не се „чесна страна“ во преговорите за завршување на војната и порача дека Иран нема да прифати компромиси кога станува збор за неговите национални права.

Калибаф ова го изјави во Техеран, за време на средбата со командантот на пакистанската армија, Асим Мунир, чија земја посредува во обидите за намалување на тензиите меѓу Иран и САД.

Според иранските медиуми, разговорите биле фокусирани на документ со 14 точки предложен од Техеран како рамка за натамошни преговори.

Иранскиот преговарач порача дека земјата ќе ги брани своите „легитимни права“ и преку дипломатија и на бојното поле. Тој предупреди дека доколку САД повторно „неразумно ја обноват војната“, последиците ќе бидат „посилни и потешки“ од претходно.

Во меѓувреме, американскиот државен секретар Марко Рубио изјави дека има одреден напредок во разговорите, но дека разликите меѓу двете страни и натаму остануваат големи.

И покрај повеќенеделниот конфликт, Иран соопшти дека ги задржал своите ракетни и беспилотни капацитети, како и резервите на збогатен ураниум.

Изјавите на Калибаф доаѓаат во момент кога дипломатските канали сè уште се отворени, но тонот меѓу Вашингтон и Техеран останува остар. Иран испраќа порака дека е подготвен да преговара, но не и да отстапи од позициите што ги смета за прашање на национален суверенитет.