Иран ја оцени својата понуда до САД како „дарежлива и одговорна“, откако американскиот претседател Доналд Трамп го отфрли одговорот на Техеран како „целосно неприфатлив“. Понудата била доставена преку Пакистан, кој останува официјален посредник меѓу двете страни.
Портпаролот на иранското Министерство за надворешни работи, Есмаил Багаеи, порача дека Техеран не бара отстапки од Вашингтон, туку крај на војната и запирање на, како што рече, „поморската пиратерија“ против иранските бродови. Тој додаде дека Иран ќе ги користи дипломатските можности кога ќе процени дека тоа е во негов национален интерес.
Според иранските медиуми, предлогот вклучува прекин на непријателствата, укинување на американските санкции, отстранување на поморската блокада и гаранции поврзани со безбедноста во Ормутскиот Теснец. Вашингтон, пак, бара слободен премин низ теснецот и услови поврзани со иранската нуклеарна програма.
Багаеи потврди дека Пакистан продолжува да посредува, а дека и други земји, меѓу кои Катар, даваат свои предлози и проценки во дипломатскиот процес. Според него, страните што учествуваат во преговорите мора да се водат од сопствените национални интереси, но и да остават простор за политичко решение.
Тензиите меѓу САД, Израел и Иран ескалираа по нападите од 28 февруари, по што Техеран возврати и го затвори Ормутскиот Теснец. Примирјето што стапи во сила на 8 април засега го држи конфликтот под контрола, но одбивањето на иранската понуда од страна на Трамп повторно го зголеми притисокот врз дипломатијата, пазарите и регионалната безбедност.
