Музиката што ги памети старите скопски игранки повторно ќе се слуша во „Лабораториум“, каде на 21 август ќе се одржи летното и воедно јубилејно издание на „Игранка“. Настанот започнува во 20 часот, а влезот е слободен.

Со ова издание се одбележуваат две години од започнувањето на концептот, кој за првпат беше реализиран во август 2024 година. Оттогаш, „Игранка“ се одржува сезонски, четири пати годишно, како простор за средба на различни генерации преку музика и танц.

Концептот е замислен како градска музичка вечер без жанровски и генерациски ограничувања. Наместо публиката да биде поделена според музички вкус или возраст, идејата е различни генерации да поминат заедничка вечер со музика од различни периоди и стилови.

Од евергрини до старите скопски игранки

Во скопскиот ноќен живот, каде музичките настани најчесто се врзани за конкретни жанрови, „Игранка“ нуди поинаков формат. Музичкиот избор се движи низ различни децении и стилови, додека танцот станува заеднички јазик за публиката.

Во изминатите две години во „Лабораториум“ беа организирани ретро вечери со македонски и светски евергрини, музика од 50-тите, 60-тите, 70-тите и 80-тите години, но и вечери посветени на танци како твист, чарлстон и валц.

Јубилејното издание ќе го предводи ДБ Класикс, диџеј дуо составено од Дарко Марковски и Борис Пауновски, искусни диџеи и радио водители.

Тие ќе пуштаат винили со стари евергрини и безвременски хитови, со селекција инспирирана од звукот на старите скопски игранки.

Музика како простор за заедничко дружење

„Игранка“ се потпира на едноставна идеја: музиката и танцот можат да ги поврзат луѓето без оглед на нивната возраст.

Во тој контекст, настанот во „Лабораториум“ не е замислен само како музичка вечер, туку и како простор за дружење и повторно откривање на музиката што одбележала различни генерации.

Летното издание ќе се одржи на 21 август од 20 часот во Културно едукативниот центар „Лабораториум“.

Влезот е слободен, а настанот е отворен за сите генерации.