Хрватската фудбалска репрезентација забележа важна победа над Панама со 1:0 во второто коло од групата Л на Светското првенство и ги задржа шансите за пласман во нокаут-фазата. Единствениот погодок на натпреварот, одигран во Торонто, го постигна Анте Будимир во 54. минута, носејќи ѝ ги првите три бода на Хрватска по поразот од Англија во воведното коло.

Селекторот Златко Далиќ направи неколку промени во стартниот состав, а натпреварот беше посебен за капитенот Лука Модриќ, кој го одигра својот 200-ти настап во националниот дрес. Првото полувреме не понуди многу причини за задоволство кај хрватските навивачи. Иако важеше за фаворит, Хрватска тешко создаваше шанси против цврстата и дисциплинирана Панама. Напротив, Панамците беа поопасни во неколку наврати и сериозно се заканија кон голот на Доминик Ливаковиќ.

По паузата, Далиќ реагираше со измени и тие брзо донесоа резултат. Во 54. минута Марко Пашалиќ одлично го проигра Јосип Станишиќ, кој испрати прецизен центаршут до Будимир. Искусниот напаѓач од непосредна близина ја затресе мрежата за водство од 1:0.Само две минути подоцна Хрватска можеше да ја удвои предноста, но Пашалиќ не успеа да реализира одлична можност пред голот на Панама.

Во продолжението Панама тргна поизразено во напад, а голманот Ливаковиќ беше еден од најзаслужните за победата. Тој имаше неколку извонредни интервенции, вклучувајќи и спектакуларна одбрана по удар со глава на Карлос Харви.

До крајот на натпреварот Хрватска успеа да ја сочува минималната предност и да освои три исклучително важни бодови. Со оваа победа „коцкестите“ остануваат во трката за место во осминафиналето, додека Панама ги загуби шансите за пласман во следната фаза.