Кинеските производители на автомобили би можеле силно да навлезат на американскиот пазар доколку бидат отстранети постојните трговски ограничувања, предупреди извршниот директор на „Хјундаи мотор“, Хозе Муњоз. Според него, искуството од Европа покажува колку брзо може да се промени односот на силите во автомобилската индустрија.
Муњоз посочи дека кинеските компании веќе освојуваат значителен дел од европскиот пазар, нудејќи автомобили кои во одредени категории се од 30 до 40 проценти поевтини од моделите на традиционалните производители. Нивното ширење продолжува и покрај дополнителните европски царини за електричните возила произведени во Кина.
Особено брз раст е забележан во Велика Британија, каде што нема дополнителни царини какви што воведе Европската Унија. Кинеските марки таму стануваат сè поприсутни благодарение на пониските цени, богатата стандардна опрема и брзиот развој на електричните и хибридните модели.
Американскиот пазар во моментов е заштитен со царини од околу 100 проценти за електричните автомобили од Кина. Муњоз смета дека без ваквите бариери САД би можеле да се соочат со сличен прилив на кинески возила како Европа.
„Сметам дека е потребна претпазливост. Ако нема заштитни механизми, може да се случи истото што веќе го гледаме во Европа“, предупреди директорот на Хјундаи.
Слична оценка претходно изнесе и извршниот директор на „Форд“, Џим Фарли, според кого кинеските производители во следните пет до десет години би можеле посериозно да се обидат да влезат на американскиот пазар.
Кинеските компании во последните години направија голем напредок во развојот на батерии, софтвер и електрични погонски системи. Компании како BYD, Geely, Chery и SAIC забрзано го прошируваат присуството надвор од домашниот пазар, а дел од нив веќе градат фабрики и производствени капацитети во Европа.
Муњоз призна дека кинеската автомобилска индустрија напредува со исклучително брзо темпо, поради што традиционалните производители ќе мора да ги намалуваат трошоците, да го забрзаат развојот и да понудат попристапни електрични автомобили.
Хјундаи истовремено соопшти дека го одложува воведувањето на сопствениот напреден систем за полуавтономно возење од 2027 за крајот на 2029 година. Компанијата во меѓувреме ќе соработува со „Нвидија“, со цел првите преодни технологии да ги понуди до 2028 година.
Натпреварот со кинеските производители, според процените на индустријата, повеќе нема да се води само преку цената. Батериите, автономното возење, автомобилскиот софтвер и брзината со која новите модели се пласираат на пазарот стануваат клучни фактори што ќе ја обликуваат иднината на автомобилската индустрија.
