Протести избувнаа во Италија откако маж од мароканско потекло почина додека беше приведен од двајца полицајци во Болоња. Илјадници луѓе излегоа на улиците во понеделник вечерта за да бараат „правда за Абдерахима Факир“, а обвинителите започнаа истрага за убиство од небрежност. Помала група демонстранти подоцна се одвои и се судри со полицијата, а немирите траеја доцна во ноќта, јавува Би-Би-Си .

Полицијата интервенираше во недела наутро во работничката населба Пиластро откако еден сосед пријави дека Факир „се однесува неорганизирано“ и тропа на вратата од гаражата. Полицајците прво се обидоа да го смират, а потоа употребија солзавец. Снимките што кружеа во италијанските медиуми покажуваат двајца полицајци како седат врз Факир додека тој лежи со лицето надолу на земја и ги моли да престанат.

Трето лице, кое не е полицаец, го притиска на нозете, додека вработените во итната помош стојат настрана. По околу две минути, Факир престанува да се спротивставува. Полициските службеници му ги врзуваат зглобовите и глуждовите, а кога еден од нив забележува дека Факир повеќе не се движи, го удира двапати. Додека вработениот во итната помош му се приближува, Факир веќе е во несвест.

Обвинителите во Болоња отворија истрага за убиство од небрежност против полицијата и болничарите на местото на настанот. Неколку сведоци за италијанските медиуми изјавија дека Факир изгледал вознемирен, но не се заканил никому и не бил вооружен. „Не можете да умрете вака“, рече неговата сестра Кадија. „Го убија безмилосно и јас сакам вистината“.

Поделени реакции на смртта

Градоначалникот на Болоња, Матео Лепоре, за весникот „Ла Република“ изјави дека сите што го виделе видеото биле „шокирани“. Тој повика на протест во центарот на градот во понеделник вечерта, каде што внуката на Факир му се придружи на сцената. „Тој беше мој чичко. Тој не беше само бројка, тој не беше само реплика во вестите, тој беше сакан“, рече Јосра Факир. „Тој заслужуваше помош и да биде слушнат, тој заслужуваше достоинство“.

Иако главниот протест беше мирен, околу 100 демонстранти се судрија со полицијата. Тие запалија два автомобила и, според обвинителите, повредени се 64 полицајци. Лепоре во вторникот изјави дека видел „две различни лица на градот“ во Болоња – илјадници луѓе кои се собрале мирно за да го поддржат семејството и помала група „кои мислат дека можат да одговорат на насилството со насилство“.

Премиерката Џорџија Мелони рече дека смртта на Факир мора да биде „темелно истражена“, но додаде дека „ништо не може да го оправда насилството врз органите за спроведување на законот“. Таа ги смета настаните за „неприфатливи“. „Оние кои решија да го искористат овој инцидент како изговор да го запалат градот, да нападнат полицајци и да сеат насилство не бараа вистина, туку конфликт“, рече Мелони.