Продолжениот викенд ги полни патиштата: долга колона возила на „Богородица“ кон Грција

Во пресрет на продолжениот викенд, голем број граѓани тргнаа кон Грција, поради што уште рано утринава се создадоа повеќе колони на граничниот премин „Богородица“. На снимките од раните утрински часови се гледа засилен сообраќај на излез од Македонија, а дополнителен наплив се очекува во текот на денот.

Долга колона автомобили е забележана на граничниот премин „Богородица“, на излез од Македонија кон Грција.

Според снимките од камерите, околу 6:45 часот возилата биле наредени во повеќе колони и чекале за преминување на границата.

Зголемената фреквенција е очекувана поради продолжениот викенд, кој многу граѓани го користат за патување кон грчкото крајбрежје. Дополнителен притисок создава и вообичаената смена на туристите кон крајот на август.

Најголем наплив кон Грција се очекува во петок и сабота, додека во недела се очекува засилен сообраќај во обратна насока, од Грција кон Македонија. Можно е подолго задржување и на грчката страна од границата.

Од „Богородица“ патниците кон Грција можат да користат и алтернативни гранични премини. За оние кои патуваат кон Солун, Аспровалта и Халкидики, како алтернатива се препорачува преминот Дојран, додека за западна Грција и Јонското Море може да се користи Меџитлија.

Возачите се советуваат пред патувањето да ја проверат актуелната состојба на граничните премини и, доколку е можно, да го избегнат периодот со најголема фреквенција.