Грција официјално поднесе дипломатски протест до Украина по инцидентот со беспилотно пловило со експлозив пронајдено во Јонското Море, во близина на Лефкада, пишува грчкиот медиум „То Вима“.

Според брифинг доставен до дипломатските дописници, министерот за надворешни работи на Грција, Јоргос Герапетритис, го информирал високиот претставник на Европската Унија за наодите од истрагата. Прашањето било разгледано и со генералниот секретар на НАТО, Марк Руте, а Герапетритис го покренал и директно со својот украински колега на состанок во Лимасол.

Според грчките информации, Атина доставила писмени и усни протести до Киев на 28 и 29 мај.

Во протестот, Грција наведува дека дронот претставувал сериозен ризик за поморскиот сообраќај и можел да доведе до цивилни жртви и значителна еколошка штета. Според дел од извештаите, беспилотното пловило носело околу 100 килограми експлозив.

Грчките власти предупредуваат дека евентуално проширување на воените операции во медитеранскиот регион може да ја загрози националната безбедност и негативно да влијае врз економијата на земјата.

Во демаршот до Киев се наведува дека правото на Украина на самоодбрана не може да оправда активности од ваков вид. Грција ја повикала Украина да се воздржи од слични дејствија во иднина, како и од, како што е наведено, неоправдано пренесување на воени операции во Медитеранот.

Според извештајот на грчкото Министерство за национална одбрана, доставен до премиерот Кирјакос Мицотакис, техничката анализа покажала дека станува збор за украински беспилотен површински брод од типот MAMAI — модел што бил користен во повеќе напади врз руски бродови.

Атинскиот „Стар ченел“ објави дека пловилото било опремено со два сателитски системи. Едниот служел за GPS позиционирање и навигација, а вториот овозможувал далечинско управување и пренос во живо од камерите на бродот до операторот.

Заклучоците на техничките тимови на Генералштабот на грчката национална одбрана ги отфрлаат првичните претпоставки дека пловилото било лансирано во близина на Лефкада од матичен брод. Според анализата на GPS-податоците, дронот влегол во грчките територијални води од морска област јужно од Италија, релативно блиску до Сицилија.

Грчките експерти сметаат дека пловилото таму било позиционирано или од матичен брод или од база во Либија што, според грчките наоди, ја користат украински специјални сили.

Техничката анализа покажала и дека дефект во системот за комуникација и далечинско управување, најверојатно предизвикан од навлегување вода во електронската единица, довел операторот да ја изгуби контролата врз дронот. Потоа морските струи го однеле до брегот на Лефкада.

Според извештаите, кога била изгубена втората сателитска врска, пловилото автоматски активирало протокол за прикривање и се движело кон однапред програмирани безбедни локации. Истражителите веруваат дека заливот кај Лефкада, каде што дронот бил пронајден, претходно бил мапиран од неговите оператори.

Атина сега очекува официјален одговор од Украина за инцидентот.