Google започна со воведување на Google Pics, нова алатка наменета за брзо генерирање и уредување фотографии со помош на вештачка интелигенција. И покрај името, Google Pics не е нова верзија на Google Photos или Google Images, туку станува збор за посебна услуга со сопствени алатки за креирање и уредување визуелна содржина.

Според Google, Pics овозможува создавање нови фотографии, но и прецизно менување на постоечките. Наместо корисникот секогаш да генерира целосно нова фотографија, алатката овозможува да се направат конкретни измени врз веќе постоечка слика.

Во основата на Google Pics се наоѓа Nano Banana, моделот на Google со вештачка интелигенција за генерирање и уредување фотографии. Компанијата засега не открива која верзија на моделот се користи во новата алатка.

Pics доаѓа директно во Google Workspace

Google Pics ќе функционира како самостојна услуга, но ќе биде интегриран и во Google Workspace. Првично, алатката ќе биде достапна во Google Docs и Google Slides, овозможувајќи им на корисниците да генерираат или уредуваат фотографии без да ја напуштаат презентацијата или документот на кој работат.

Во следните неколку недели се очекува интеграцијата да биде проширена и на Google Drive.

Сепак, новата алатка засега нема да биде достапна за сите корисници. Пристап ќе имаат претплатниците на Google AI Pro и Google AI Ultra, како и поголемиот дел од деловните корисници на Google Workspace. Воведувањето на Pics започнува постепено, а новите функции и интеграциите со различните Google услуги ќе се појавуваат во текот на следните неколку недели.

Со Google Pics, компанијата очигледно сака генерирањето и уредувањето фотографии со вештачка интелигенција да го направи дел од секојдневниот работен процес, директно во алатките што корисниците веќе ги користат.