Германскиот автомобилски гигант Volkswagen објави значително послаби финансиски резултати за првиот квартал од годинава, дополнително засилувајќи ја загриженоста за состојбата во глобалната автомобилска индустрија.
Компанијата пријави пад на оперативниот профит од 14,3 проценти, при што добивката изнесува 2,5 милијарди евра, значително под очекувањата на аналитичарите, кои прогнозираа речиси 4 милијарди евра. Приходите од продажба достигнале 75,66 милијарди евра, што претставува намалување од 2,5 проценти во споредба со истиот период минатата година.
Од Volkswagen како главни причини за послабите резултати ги посочуваат повисоките американски царини, засилената конкуренција од кинеските производители и нестабилната геополитичка состојба.
Извршниот директор на компанијата, Оливер Блуме, изјави дека автомобилската индустрија се соочува со исклучително сложени предизвици.
„Војните, геополитичките тензии, трговските бариери, построгата регулатива и силната конкуренција создаваат сериозни пречки. И покрај ова, успеавме да постигнеме конкретен напредок“, изјави Блуме.
Европските производители на автомобили веќе подолг период се соочуваат со сериозен притисок поради високите производствени трошоци, строгите еколошки регулативи и забавениот раст на пазарот на електрични возила.
Дополнителен ризик претставуваат и актуелните геополитички тензии, вклучително и конфликтите на Блискиот Исток, кои би можеле дополнително да ја намалат побарувачката, особено во сегментот на поскапите возила. За да ја подобри профитабилноста, Volkswagen веќе спроведува мерки за штедење, а најавени се и нови кратења, вклучително и намалување на бројот на вработени.
Овие резултати се уште еден сигнал дека европската автоиндустрија влегува во турбулентен период, во кој борбата со азиската конкуренција и глобалната економска неизвесност станува сè пожестока.
