Бројот на рецепти за GLP-1 лекови за слабеење издадени за деца под 12 години во Соединетите Американски Држави порасна за повеќе од 300 пати од 2019 година наваму, покажува ново истражување објавено во списанието „Pediatrics“. Педијатрите сè почесто посегнуваат по овие терапии кај најмладите пациенти кои се соочуваат со екстремни форми на прекумерна тежина и сериозни придружни дијагнози, и покрај отсуството на официјално одобрение за оваа возрасна група.
Анализата опфати над 3,5 милиони деца на возраст од осум до 11 години со прекумерна тежина кои немаат дијабетес. Податоците од националната база „Epic Cosmos“, која содржи картони на повеќе од 300 милиони американски пациенти, откриваат драстична промена во праксата.
Уделот на препишани рецепти за овие медикаменти скокнал од 0,03 проценти во 2019 година на 9,3 проценти до средината на годинава. Вкупно 20.282 деца примиле терапија во анализираниот период. Најзастапен на рецептите бил лекот „Wegovy“ на компанијата „Ново Нордиск“, а лекарите ги препишувале и „Saxenda“ од истиот производител, како и „Zepbound“ на „Ели Лили“.
Овие медикаменти сè уште немаат формално одобрение од надлежните регулатори за пациенти помлади од 12 години. Сепак, постојните клинички упатства им даваат дискреционо право на педијатрите да ги воведат во третманот кај деца од осумгодишна возраст доколку здравствената состојба го налага тоа.
Речиси сите третирани пациенти имале дијагностицирана тешка дебелина, дури 94 проценти од вкупниот број. Дополнително, 65 проценти од децата веќе развиле барем една сериозна придружна состојба, како покачен холестерол, артериска хипертензија или апнеја при спиење.
Употребата на оваа класа лекови забрзано се шири во педијатријата, предупредува раководителот на истражувањето д-р Бабак Оранди од здравствениот центар „NYU Langone Health“. Според него, неопходно е долгорочно следење на овие пациенти за медицинската наука да добие јасна слика за безбедноста и ефектите врз детскиот развој.
Истражувањето отвора и социјален јаз во американското здравство. Децата кои живеат во побогати средини имаат 55 проценти поголеми шанси да добијат ваков рецепт во споредба со врсниците од посиромашни семејства. Коавторот на студијата Алан Меси од Медицинскиот факултет „Гросман“ при Универзитетот во Њујорк посочува дека лекарите и креаторите на здравствените политики мора да најдат начин овие скапи терапии да бидат достапни и за децата без приватно здравствено осигурување.
