Германија е погодена од силен топлотен бран кој би можел да донесе температури и до 41 степен Целзиус, што би се приближило до националниот рекорд од 2019 година. Според прогнозите, во среда се очекуваат температури до 38 степени во западните и југозападните делови на земјата, додека во петок термометрите би можеле да се искачат до 41 степен во одредени региони.

Највисоката температура некогаш измерена во Германија изнесува 41,2 степени и е регистрирана во јули 2019 година, додека јуни досега го држи рекордот со 39,6 степени.

Ноќи без разладување

Експертите предупредуваат дека и ноќите нема да донесат олеснување. Во урбаните области во западна Германија се очекуваат температури над 24 степени, што метеоролозите ги опишуваат како „практично неподносливи без климатизација“.

Во земја каде што климатизацијата во домовите не е вообичаена, ваквите услови отвораат нова дебата – сè повеќе граѓани размислуваат за инсталирање клима уреди, нешто што традиционално не било дел од германското секојдневие.

Топлотен бран низ Европа

Слични екстремни температури се бележат и во други делови од Европа. Франција регистрираше најтопла ноќ од 1947 година, со просечни 21,6 степени, додека во неколку европски земји се активирани црвени временски предупредувања.

Во Обединетото Кралство, температурите би можеле да достигнат до 40 степени, додека метеоролозите предупредуваат дека климатските промени дополнително го засилуваат ефектот на т.н. „топлотна купола“ над Западна Европа.