Германија во јуни забележа најголем број смртни случаи од давење во последните 23 години. Според податоците на Германското здружение за спасување на вода (DLRG), најмалку 99 луѓе ги загубиле животите, што е најцрниот јуни од 2003 година.

Најголемиот дел од несреќите се случиле во езера и реки, каде што многумина барале разладување за време на екстремниот топлотен бран. Од 99-те жртви, повеќе од 90 проценти биле мажи, а дури 40 биле помлади од 30 години.

Според DLRG, најчести причини се преценување на сопствените пливачки способности, опасни речни струи, нагли температурни разлики при влегување во вода, но и алкохол или здравствени проблеми. Организацијата апелира граѓаните да пливаат само на обезбедени капалишта, да избегнуваат реки со силни струи и никогаш да не влегуваат во вода под дејство на алкохол.

Рекордниот број давења доаѓа во период кога Европа се соочува со екстремни температури. Научниците предупредуваат дека топлотните бранови стануваат сè почести и поинтензивни, што носи дополнителни ризици за луѓето кои спас од жештините бараат во природните води.