Основното јавно обвинителство за гонење организиран криминал и корупција (ОЈО ГОКК) побара нова мерка притвор за сопственикот на кочанската дискотека „Пулс“, Дејан Јованов, на само два дена пред да му истече максималниот законски притвор. Јованов, кој е првообвинет за пожарот во кој загинаа 63 млади лица, сега се сомничи за давање поткуп на службеник во Министерството за економија со цел да обезбеди нелегална лиценца за работа.

Истрагата на ОЈО ГОКК утврдила дека Јованов во два наврата му дал пари на обвинетиот службеник Џеваир Камбери од Министерството за економија. Целта била да се извади официјална лиценца за вршење угостителска дејност за кабарето „Пулс“, иако објектот воопшто не ги исполнувал законските услови.

Јованов воопшто не поднел ниту формално барање за издавање на дозволата. Службеникот Камбери веќе се наоѓа на обвинителна клупа во рамки на големиот судски процес што го води Основното јавно обвинителство од Кочани, каде што одговара за примање поткуп.

Барањето за нов притвор доаѓа во критичен момент, бидејќи законскиот рок за задржување на Јованов за тешки дела против општата сигурност истекува на 3 октомври и повеќе не може да се продолжува. Доколку судот не одреди нова мерка, тој би се нашол на слобода.

Од ОЈО ГОКК посочуваат дека за кривичното дело давање поткуп е предвидена затворска казна од 1 до 10 години. Обвинителот оценил дека ризикот од бегство на осомничениот е реален и висок, особено со оглед на тежината на паралелната судска постапка што веќе се води против него.

Кривичниот суд во Скопје утре треба да се произнесе по предлогот на обвинителството и да одлучи дали ќе одреди нова мерка со која ќе се оневозможи Јованов да ја напушти државата.