Гаро Тавитјан доби ново големо меѓународно признание. Македонскиот тапанар, композитор, аранжер и продуцент е добитник на „Drummerworld Hall of Fame – Lifetime Achievement Award“, награда за животно достигнување со која се одбележува неговиот придонес кон уметноста на тапанарството и музиката.
Признанието доаѓа од „Drummerworld“, меѓународна платформа посветена на тапанарството и ударните инструменти, основана во 1997 година. За Тавитјан, ова признание има и дополнително значење – неговата меѓународна работа не е само претставување на сопствената музика, туку и начин македонските ритми да стигнат до светската публика.
Во своите презентации тој ги обработува традиционалните македонски неправилни ритми – 5/8, 7/8, 9/8 и 11/8, како и „Тешкото“, претставувајќи ги преку современиот јазик на тапаните. Дел од овие изведби и едукативни материјали се објавени и преку „Drummerworld“.
Тавитјан во својата порака по повод признанието се навраќа токму на оваа страна од својата кариера. Кога добил можност да стане дел од меѓународната тапанарска енциклопедија, сакал просторот да го искористи и за презентација на македонските ритми пред светската музичка заедница.
Зад признанието стои повеќедецениска кариера. Тавитјан е професионален тапанар, композитор, аранжер и продуцент, а неговите официјални профили на „Zildjian“ и „D’Addario/Evans“ го наведуваат како меѓународен музички артист и наградуван тапанар. Според профилот на „Zildjian“, во текот на кариерата има реализирано повеќе од 500 големи концертни настапи во Европа, Англија, Азија, САД и на Балканот.
Во 2001 година добил стипендија за „Berklee College of Music“, а една година подоцна студирал и на „Wolfgang Jazz Academy“ во Германија. Од 2002 година неговата кариера е тесно поврзана и со неговиот брат Диран Тавитјан, со кого настапуваат како „Tavitjan Brothers“.
Во текот на кариерата соработувал со музичари како Мајк Стерн, Френк Гамбале, Ерик Мариентал, Рани Крија и Морис Плежр. Неговата работа е претставувана и преку специјализирани меѓународни музички и тапанарски платформи.
Тавитјан е поврзан и со големи производители на музичка опрема, меѓу кои „Zildjian“, „Vic Firth“, „Evans/D’Addario“, „Cympad“ и „RTOM“. Неговите настапи и едукативни материјали се објавувани и преку „Modern Drummer“ и „Drum Talk TV“.
Во 2023 година, според објавените информации, бил избран меѓу 500 влијателни тапанари во светот од страна на „Drummerworld“. Но, зад меѓународната кариера стои и нешто многу попрепознатливо за македонската публика – ритамот.
Тавитјан со години ги претставува македонските неправилни тактови како дел од современиот јазик на тапаните, покажувајќи дека 5/8, 7/8, 9/8 и 11/8 не се само дел од традицијата, туку и материјал со кој може да се комуницира со светската музичка сцена. Во својата најнова порака тој им се заблагодари на луѓето кои имале најголемо влијание врз неговиот музички развој,неговиот татко Гарабет Тавитјан, братот Диран и професорите Зоран Спасовски и Кристијан.
Посебно место во благодарноста има професорот Зоран Спасовски, за кого Тавитјан наведува дека уште во нижото и средното музичко образование му помогнал да го совлада нотниот запис за ударни инструменти и тапани. Тоа знаење, според него, подоцна му помогнало полесно да ја разбира и најсложената светска литература за тапани. Тој упатува благодарност и до својата мајка за нејзината посветеност кон семејството.
„Drummerworld Hall of Fame – Lifetime Achievement Award“ така доаѓа како ново поглавје во меѓународната кариера на Гаро Тавитјан – кариера во која се спојуваат музичкото образование, повеќедецениската работа, соработките со светски музичари и нешто што за македонската културна сцена има особена тежина: претставувањето на македонскиот ритам пред светот.
