Претседателката на Европската комисија Урсула фон дер Лајен денеска во Тирана порача дека Албанија е меѓу предводниците во процесот на пристапување кон Европската Унија. Истовремено со официјалната средба во премиерскиот кабинет, илјадници граѓани протестираа на улиците обвинувајќи ја владата за корупција и критики кон Брисел за премолчување на проблемите со владеењето на правото.

Фон дер Лајен најави дека Европската комисија следната недела ќе претстави нови мапи на патот за земјите што предводат во евроинтеграциите, меѓу кои покрај Албанија се наоѓаат и Црна Гора, Молдавија и Украина.

„Од мојот последен престој тука, Албанија постигна исклучителен напредок. Го отворивте последниот кластер преговарачки поглавја, а во јули ги затворивте првите три поглавја. На светот гледаме со исти очи, што е клучно за пристапниот процес“, изјави претседателката на Европската комисија на заедничката прес-конференција со премиерот Еди Рама.

Таа додаде дека пристапувањето ќе се води според заслугите, но дека геополитичката реалност наложува забрзување на процесите. Сепак, нагласи дека Тирана мора да продолжи со реформите во правосудството, изборниот систем и заштитата на животната средина.

Посетата на високата претставничка на Брисел беше пречекана со масовен граѓански револт. Стотици демонстранти се собраа пред владината зграда со транспаренти „Нема ЕУ со Рама“, одбележувајќи го 123. ден од протестите.

Движењето, кое локално го доби името „фламинго револуција“, започна како реакција на најавите за изградба на луксузен туристички комплекс во заштитено мочуришно подрачје, поврзан со Џаред Кушнер. Демонстрантите упатија директни критики и кон европските претставници поради одбивањето отворено да адресираат прашања за коруптивни зделки и деградација на животната средина.

Рама изјави дека ја информирал гостинката за напредокот околу големиот инвестициски проект и најави дека наскоро ќе биде објавена детална студија за влијанието врз животната средина преку нова интернет-платформа за транспарентност.

Турнејата на Фон дер Лајен низ Западен Балкан опфаќа и посети на Косово, Црна Гора и Северна Македонија. Посетите на Србија и Босна и Херцеговина се одложени за подоцнежен термин поради претстојните изборни циклуси во двете земји.

Лидерите на Европската Унија треба да расправаат за внатрешните реформи и пакетот за проширување на самитот закажан за 15 и 16 октомври.