„Фолксваген“ влегува во нова и поостра фаза од своето реструктурирање по намалените очекувања за добивката и растечкиот притисок врз германската автомобилска индустрија.
Директорот на основната марка „Фолксваген“, Томас Шефер, пред вработените во Волфсбург изјавил дека програмата мора да се спроведува побрзо. Компанијата сака да ги намали вишокот производствени капацитети во Германија, трошоците за работна сила и расходите за развој на нови модели.
Надзорниот одбор претходно одобри план за укинување дополнителни 50.000 работни места во целата групација. Овие кратења се надоврзуваат на веќе договореното намалување на бројот на вработени до 2030 година. Засега не е објавена конечна распределба по држави, но според процената на премиерот на Долна Саксонија и член на Надзорниот одбор, Олаф Лис, околу половина од новите кратења би можеле да бидат во Германија.
Под посебно внимание се погоните во Емден, Цвикау и Хановер, како и фабриката на „Ауди“ во Некарзулм. За нив треба да се пронајдат нови производствени програми или алтернативна намена. Доколку тоа не се случи, постои можност во наредните години да престане производството на автомобили на овие локации.
Компанијата сè уште не објавила конечна одлука за целосно затворање на фабриките. Преговорите со синдикатите и претставниците на вработените продолжуваат, а работничките организации бараат гаранции дека мерките нема да доведат до принудни отпуштања.
Реструктурирањето доаѓа во период на сериозни проблеми за најголемиот европски производител на автомобили. „Фолксваген“ се соочува со послаба побарувачка во Европа, пад на профитот во Кина, силна конкуренција од азиските производители и повисоки американски царини.
Групацијата неодамна ја намали прогнозата за оперативната профитна маржа во 2026 година на најмногу еден процент. Раководството смета дека компанијата има значителен вишок капацитети и дека се потребни помал број модели, поедноставна организација и поголем обем на производство по модел.
Најавените мерки предизвикаа протести на автомобилските работници низ Германија. Покрај вработените во „Фолксваген“, на демонстрациите учествуваа и работници од „Мерцедес-Бенц“, БМВ и „Бош“, барајќи посилна индустриска политика и заштита на работните места.
