Од 3 до 9 август во Скопје се одржува седмото издание на Флипбук филм фестивал. Настанот годинава првпат се шири на седум фестивалски дена и три градски локации: КОТУР, Кинотеката и просторот „Sе“. Во шесте фестивалски селекции публиката ќе може да види вкупно 185 анимирани филмови, меѓу кои остварувања во главната конкуренција, студентски дела, анимирани документарци и музички видеа.
Фестивалот започнува со тридневната Европска панорама во културната установа КОТУР, каде од 3 до 5 август се прикажуваат наградувани европски остварувања. Меѓу нив се издвојуваат „Water Girl“ на Сандра Десмазие, филмот „Dull Spots of Greenish Colours“ на Саша Свирски кој го освои Гран-прито на Анимафест, како и латвискиот филм „Freeride in C“ на Едмундс Јансонс.
Официјалното отворање е закажано за 6 август во паркот на Кинотеката. Вечерта продолжува со патувачката програма WTF OFF, односно избор од неконвенционални и провокативни анимирани филмови што лично ќе ги претстави селекторот Себастијан Сперер. Во главната конкуренција влегуваат забележителни авторски филмови, меѓу кои „Please“ на Ана Манцарис, „Winter in March“ на Наталија Мирзојан, „Dollhouse Elephant“ на Јени Јокела и „A Pint of Bitter“ на Конор Кехили.
За наградите во главната и студентската конкуренција одлучува тричлено жири составено од англискиот автор Томас Волда, српската режисерка и продуцентка Марија Вулиќ и босанската режисерка Алета Рајиќ. Документарните анимирани филмови и музичките видеа ќе ги оценуваат словенечката продуцентка Тина Смрекар, аниматорот Вук Јевремовиќ и хрватскиот режисер Марко Мештровиќ. Членовите на жирито ќе одржат мастер-класови, изложби и презентации.
Новина на овогодишното издание е програмата „Бумбар“, наменета за деца над седум и млади над дванаесет години, која ќе се одржи на 8 и 9 август во Кинотеката. Покрај 36 кратки филмови, програмата опфаќа и работилници за изработка на флипбук, развој на сценарио и продукција на краток анимиран филм со еколошка тематика во соработка со „Еко-свест“. Оваа организација ќе додели и посебна награда за најдобар филм за заштита на животната средина.
Придружната програма нуди изложби на цртежи, кукли и сценографии, како и разговори со авторите. На 7 август се отвара изложбата „Between Frames“, а на 9 август Вук Јевремовиќ ќе одржи мастер-клас и ќе ја претстави својата изложба на графики.
