FilmBox, еден од најпрепознатливите брендови во портфолиото на SPI International, официјално започнува големо ребрендирање кое ќе стапи на сила од 10 јуни. Промените опфаќаат нова стратегија за телевизиските канали, целосно освежен визуелен идентитет и трансформација на стриминг услугата.

Новата бренд-архитектура воведува неколку тематски канали: FILMBOX+ One, FILMBOX+ Love & Crime, FILMBOX+ Hits, FILMBOX+ Emotion, FILMBOX+ Action, FILMBOX+ Comedy и FILMBOX+ Festival. Секој од нив ќе биде фокусиран на специфичен тип публика и жанровска содржина, со цел полесно насочување кон интересите на гледачите.

Покрај телевизиските канали, компанијата ја редизајнира и својата стриминг услуга, која отсега ќе се вика FILMBOX+ Stream. Новата платформа ќе понуди курирани колекции, богата библиотека со филмови и серии, како и ТВ канали во живо. Од компанијата велат дека целта е да се создаде искуство за гледачи кои сакаат брзо и лесно да пронајдат содржина, без постојано пребарување и „скролање“.

„FilmBox е камен-темелник на нашето меѓународно портфолио. Ова ребрендирање претставува следна фаза во развојот на брендот, каде новата содржинска стратегија и модерната архитектура на брендот се усогласуваат со потребите на публиката“, изјави Патрицја Галонзка-Струзик, главен директор за маркетинг и дигитални технологии во SPI International.

Секој канал ќе добие ново лого, модерен визуелен идентитет и посебна шема на бои, што треба да овозможи полесно препознавање и разликување на брендовите. Компанијата наведува дека промените се дел од поширока стратегија за поголема конзистентност меѓу линеарната телевизија и дигиталните платформи.

Каналите и понатаму ќе бидат достапни преку кабелски и сателитски оператори во повеќе од 40 земји, особено во Централна и Источна Европа и Балканот, каде FilmBox има силно присуство.

SPI International е глобална медиумска компанија која управува со телевизиски канали и дигитални платформи на шест континенти. Во нејзиното портфолио се брендовите FilmBox, Film1, Kino Polska, DIZI и други тематски канали и стриминг сервиси. Компанијата соработува со повеќе од 800 оператори ширум светот и повеќе од 25 години е активна во дистрибуција на филмови и телевизиска содржина.