Со доделување на фестивалските награди и изведба на претставата „Гидионовиот јазол“ за затворање, синоќа во Битола заврши 27. издание на Интернационалниот фестивал на монодрама.
Гран при наградата годинава ја доби претставата „#НОТИ“ од Романија, во продукција на театарот „Тони Буландра“, во режија на Касандра Топологеану, со актерка Андреа Танасе. Според жирито, станува збор за современ театарски проект што ги поврзува физичкиот театар, психолошката димензија и темите на изолација, насилство и преиспитување на женственоста.
Наградата за најдобар актер ја доби Јано Изорија од Грузија за улогата во претставата „КВАРКВАРЕ“, во продукција на театарот „Поти Валеријан Гунија“, во режија на Саба Асламазишвили. Жирито ја оцени неговата изведба како брилијантна, со силен темперамент, енергија и богат сценски израз.
За најдобра режија беше наградена Жива Бизовичар за претставата „ЏЕКИ“, во продукција на Драмски театар од Македонија, со актерката Трајанка Илиева – Вељиќ. Истата претстава ја доби и наградата од публиката.
За најдобрите остварувања одлучуваше меѓународното жири во состав Керолајн Бернс Кук, Анџелина Роска и Кире Ѓоревски. Годинашното издание на фестивалот уште еднаш ја потврди Битола како важна сцена за монодрамата и за меѓународната театарска размена.
