Организаторите на Изборот за песна на Евровизија ги изменија правилата, со што на сите земји кои се наоѓаат во вооружен конфликт им се одзема правото да бидат домаќини на овој популарен музички фестивал. Традиционално, Евровизија секоја година ја организира јавниот сервис на земјата што победила на претходното издание. Настанот функционира како заедничка продукција на јавните сервиси кои членуваат во Европската радиодифузна унија (ЕБУ).

Со новите одредби, победничкиот радиодифузер автоматски ќе ја изгуби можноста за домаќинство доколку вооружен конфликт или чувствителна геополитичка состојба директно ја загрозува безбедноста и стабилноста на таа држава или нејзиниот регион. Бидејќи меѓу членките на ЕБУ има и радиодифузери надвор од географските граници на Европа, оваа манифестација не е ограничена исклучиво на европскиот континент.

Пред да се донесе конечната одлука за тоа дали победничката земја е способна безбедно да го организира настанот, ЕБУ ќе има можност да побара независна безбедносна проценка од надворешни експерти. Иако во официјалното соопштение на организацијата не беше спомената ниту една конкретна држава, познато е дека Израел беше многу блиску до победа и заврши на второто место на изборите во 2025 и 2026 година.

Петиција и бојкот одбележаа дел од изминатото издание во Виена, каде што пет земји – Шпанија, Ирска, Хoландија, Словенија и Исланд – одбија да учествуваат. Тие истакнаа дека не можат да делат сцена со Израел поради воените дејствија во Газа.

Во случаи кога победничката земја нема да биде во можност да го организира натпреварот, ЕБУ брзо ќе одреди нова земја домаќин. Според новите утврдени правила, новоназначената држава ќе го организира целиот спектакл во свое име и нема да има обврска да го реализира настанот од името на првобитниот победник.

Ова прашање беше актуелно и во минатото, кога Украина беше домаќин во 2017 година и покрај тогашните конфликти во источниот дел од земјата. Меѓутоа, откако Украина победи во 2022 година, таа не можеше да го организира фестивалот следната година поради целосната воена инвазија, па затоа Евровизија во 2023 година се одржа во Ливерпул, Обединетото Кралство.