Големи делови од Европа повторно се соочуваат со екстремни горештини и разорни шумски пожари. Од Грција и Италија, преку Шпанија и Франција, до Албанија, пожарникарите се борат со огнената стихија, додека властите евакуираат население и издаваат највисоки предупредувања. Во исто време, метеоролозите најавуваат нов топлотен бран.

Европа сè уште не успева да се опорави од рекордната суша и историски ниските водостоји на реките, а континентот повторно се соочува со екстремни температури и големи шумски пожари.

Во Грција во понеделникот избувна пожар во селото Куварас, околу 60 километри југоисточно од Атина. На терен беа ангажирани речиси 200 пожарникари, а пожарот во меѓувреме е ставен под контрола. Сепак, големи делови од централна и јужна Грција, вклучително и поширокото подрачје на Атина и повеќето острови во Егејското Море, во вторникот се соочуваат со висок ризик од шумски пожари.

Во пожарите што ја зафатија земјата во последните недели загинаа пет лица, меѓу кои четворица пожарникари и пилот на хеликоптер ангажиран во гаснењето од воздух. Голем пожар западно од Атина уништи и десетици куќи во туристичкото место Порто Гермено.

Околу 800 луѓе евакуирани во Шпанија

Во Шпанија пожарникарите се борат со три големи шумски пожари на југот на земјата. Поради променливите ветрови и тешко пристапниот терен, околу 800 луѓе морале да бидат евакуирани.

Само во пожарот во провинцијата Уелва, во Андалузија, ангажирани се повеќе од 600 пожарникари и 26 летала. Властите ја наредија евакуацијата на општината Ел Мадроњо, со околу 300 жители. Пожари има и во Кастељон и Сеговија, а сите три се класифицирани како пожари од втор степен на сериозност.

Во Италија изгореа повеќе од 80.000 хектари

Италија исто така се соочува со исклучително висок ризик од пожари поради топлотниот бран предизвикан од антициклон од северна Африка. Во 19 градови е прогласено црвено предупредување за опасни температури. Според податоците на еколошкото здружение „Легамбиенте“, од почетокот на годината во Италија изгореле 80.325 хектари, со што е надмината проценката од 70.000 хектари дадена на крајот на јули.

Најтешко погодени се Сицилија, Калабрија и Пуља, на кои отпаѓаат околу 73 отсто од вкупната изгорена површина. Но пожарите не ја поштедија ниту северна Италија. Во Ломбардија и натаму се активни најмалку седум пожари.

Франција го зголемува степенот на опасност

Во Франција денеска 42 департмани се под ризик од шумски пожари, наспроти 17 еден ден претходно. По големите пожари во Жиронд и Вар, пожарникарите сега се фокусирани на департманот Дром, каде што пожарот продолжил постепено да се шири.

Пожари и во Албанија

И Албанија се бори со голем шумски пожар на планината Круја. Пожарникари, хеликоптери и припадници на армијата во текот на ноќта работеле на негово ставање под контрола. Жителите од неколку села биле евакуирани, а приведен е и маж осомничен дека случајно го предизвикал пожарот.

Нов топлотен бран се приближува

Покрај пожарите, Европа се подготвува и за нов период на екстремни горештини. Големи делови од Велика Британија и Франција веќе се под предупредувања поради високите температури, со околу 35 степени Целзиусови.

Во следните денови невообичаено високи температури се очекуваат и во земји кои поретко се соочуваат со вакви горештини, меѓу кои Швајцарија, Австрија и Унгарија. Комбинацијата од долготрајна суша, високи температури и сува вегетација создава услови во кои пожарите полесно се шират и потешко се ставаат под контрола.