Голем дел од Западна Европа се соочува со екстремен топлотен бран, поради што метеоролошките служби во повеќе држави издадоа предупредувања од највисок степен и апелираа граѓаните да ја ограничат изложеноста на сонце. Во Холандија, Кралскиот метеоролошки институт прогласи портокалов метеоаларм за поголемиот дел од земјата поради очекуваните екстремно високи температури во наредните денови.

Предупредувањето важи за сите покраини, освен Фризија, Дренте и Гронинген, каде е активен жолт метеоаларм. Според прогнозите, температурите во Холандија во следните три дена ќе достигнуваат најмалку 34 степени Целзиусови.

Црвен аларм за милиони луѓе во Велика Британија

Уште посериозна е состојбата во Велика Британија, каде метеоролошките власти прогласија црвен метеоаларм за голем дел од Англија и Велс. Предупредувањето опфаќа подрачја од Лондон до Свонси и од Сомерсет до Бирмингем, а ќе биде во сила од утре наутро до четврток навечер.

Британската метеоролошка служба предупреди дека топлотниот бран може да има сериозни последици врз здравјето на населението, вклучително и состојби опасни по живот. Властите предупредуваат дека ќе бидат потребни значителни промени во секојдневните активности и работните процеси, а не се исклучени ниту прекини во снабдувањето со електрична енергија и проблеми во инфраструктурните системи чувствителни на високи температури.

Франција бележи последици од жештините

И Франција е погодена од силен топлотен бран, а властите веќе предупредуваат на трагичните последици од високите температури. За време на викендот во земјата биле регистрирани околу 20 смртни случаи од давење. Француската министерка за спорт и млади Марина Ферари апелираше граѓаните да бидат особено внимателни и да пливаат исклучиво на обезбедени капалишта и базени под надзор.

Таа предупреди дека капењето во необезбедени зони за време на топлотни бранови може да претставува сериозен ризик за безбедноста. Според француските власти, повеќе од 90 проценти од населението во земјата моментално е изложено на екстремно високи температури.

Метеоролозите предупредуваат дека топлотниот бран би можел да продолжи и во наредните денови, додека голем дел од Европа се подготвува за нов температурен пик оваа недела.