Новиот европски систем за влез и излез (EES), кој целосно стапи во функција во април 2026 година, би можел сериозно да влијае врз патувањата на граѓаните од Македонија кон Грција, особено во периодите на викенди, празници и летни одмори.
Станува збор за дигитален систем кој ги заменува печатите во пасошите со електронска регистрација на патниците. При влез во земјите од Шенген-зоната, патниците кои не се државјани на ЕУ мора да остават биометриски податоци – фотографија и отпечатоци од прсти.
Туристичката комора предупредува дека токму овие нови процедури можат да создадат дополнителни метежи на граничните премини кон Грција, особено на Богородица – Евзони, каде и без новите правила често има километарски колони во шпицот на сезоната.
Според европските медиуми, на некои аеродроми и гранични премини веќе се регистрирани чекања од неколку часа поради проблеми со новиот систем, нефункционални киосци и дополнителни проверки.
Поради страв од туристички хаос, Грција веќе воведе олеснувања за дел од патниците, а се разгледуваат и дополнителни мерки за намалување на гужвите во текот на летото.
Од туристичкиот сектор во регионот предупредуваат дека најголем удар би можеле да почувствуваат токму викенд-патниците, кои масовно патуваат кон грчките плажи во петок навечер и за време на празници. Според нив, секое дополнително задржување по патник може да создаде огромни колони на границите.
Европската унија тврди дека системот на долг рок ќе ја подобри безбедноста и ќе овозможи побрза контрола на патниците, но првите недели од неговата целосна примена покажуваат дека транзицијата нема да биде едноставна.
Паралелно со EES, Европската унија најавува и воведување на системот ETIAS до крајот на 2026 година, преку кој патниците од земји надвор од ЕУ ќе мора однапред електронски да добиваат дозвола за патување.
