Финска во септември ќе биде домаќин на самит на лидерите на Европската Унија посветен на Арктикот, регион чија геополитичка важност, како што наведуваат од Хелсинки, продолжува брзо да расте.

Изјавите на американскиот претседател Доналд Трамп дека данската автономна територија Гренланд треба да стане американска, како и одлуката на Кина да испрати контејнерски брод по рута низ Арктикот, дополнително ја потврдија стратешката важност на овој регион.

Самитот ќе се одржи во Рованиеми

Самитот ќе се одржи на 13 и 14 септември во северниот фински град Рованиеми.

Целта е да се „зајакне заедничкиот стратешки пристап на ЕУ кон арктичкиот регион, чија геополитичка важност и натаму брзо расте“, соопшти кабинетот на финскиот премиер Петери Орпо.

На самитот, меѓу другите, се очекува да учествуваат германскиот канцелар Фридрих Мерц, полскиот премиер Доналд Туск и данската премиерка Мете Фредериксен, како и шефицата на дипломатијата на ЕУ, Каја Калас, и претседателот на Европскиот совет, Антонио Кошта.

„Арктичкиот регион е сè поважен дел од европското безбедносно опкружување“, изјави финскиот премиер.

Топењето на мразот отвора нови рути и пристап до ресурси

Топењето на ледениот покривач ја зголеми стратешката важност на Арктикот, бидејќи го олеснува пристапот до клучни природни ресурси и отвора нови поморски рути.

Јужнокорејски контејнерски брод во саботата отплови кон Европа преку Арктикот, што е најнов пример за обновениот интерес за оваа поморска рута.

Интересот доаѓа во период кога блокадата на сообраќајот на Блискиот Исток продолжува поради војната меѓу САД и Иран.

Сепак, и ако глобалното затоплување ја олесни пловидбата, се очекува овој морски пат да остане споредна рута во глобалната трговија.