Тензиите меѓу САД и Иран достигнуваат нов врв, откако Техеран објави дека нема да учествува во преговори и дека Ормускиот теснец ќе остане затворен. Иранската револуционерна гарда соопшти дека блокадата ќе трае сè додека не се укине американската блокада на иранските пристаништа. Во меѓувреме, на бродовите им е наредено да не се приближуваат до теснецот, со предупредување дека секој обид ќе се смета за соработка со „непријателот“.
Паралелно, Доналд Трамп испрати остри закани, изјавувајќи дека ова е „последна шанса“ за Иран да прифати договор. Според новинар на Fox News, Трамп рекол дека доколку не се постигне договор, „целата земја ќе одлета во воздух“. Тој најави и можни напади врз клучна инфраструктура, вклучувајќи мостови и електрани.
Во исто време, американските власти нагласуваат дека „сите опции се на маса“, додека дипломатските канали формално сè уште се отворени. Специјални претставници на Вашингтон се очекува да отпатуваат во Исламабад во обид да се продолжат разговорите.
Затворањето на Ормускиот теснец, еден од најважните светски енергетски коридори веќе предизвикува сериозни нарушувања во глобалната трговија и може повторно да ги зголеми цените на нафтата. Ситуацијата останува крајно неизвесна, а секој нов потег од двете страни може да доведе до поширока регионална и глобална ескалација.
