Епл денеска ја почна продажбата на својот прв телефон на преклопување, ајфон Дуо. Пазарните аналитичари следат дали новиот уред ќе успее да го промени пазарот на преклопни телефони, како што ајфонот своевремено го промени пазарот на паметни телефони, пренесува Ројтерс.

Приемот на новиот уред би можел да биде и првиот голем тест за новиот извршен директор на Епл, Џон Тернус, поранешен раководител на одделот за хардвер. Тој го претстави телефонот пред нешто помалку од една недела, откако во септември ја презеде функцијата.

Успехот на ајфон Дуо би можел значително да влијае врз пазарната ниша во која конкурентите како Самсунг и Хуавеи веќе со години продаваат премиум уреди.

Побарувачката за новиот телефон беше голема уште при претнарачките. Само неколку минути по нивното отворање минатиот петок, проценетите рокови за испорака во САД беа поместени до крајот на јануари, бидејќи побарувачката ја надминала понудата. Од Епл реакцијата на купувачите ја опишале како „ништо помалку од извонредна“.

Во Сиднеј, каде што денеска почна продажбата во првата продавница на Епл, купувачите се наредиле пред објектот уште пред отворањето во осум часот наутро по локално време. Цената на моделот ајфон Дуо со 512 гигабајти меморија изнесува 3.899 австралиски долари, односно околу 2.734 американски долари.

Дизајнот е пофален, но камерата и практичноста се предмет на критики

Првите рецензии го пофалија дизајнот на уредот, како и цврстата шарка што речиси не се забележува. Тоа претставува значителен напредок кај телефоните на преклопување, кај кои видливиот набор на екранот долго време беше еден од главните недостатоци и ги одвраќаше потенцијалните купувачи.

Сепак, рецензентите предупредија дека некои компромиси би можеле да разочараат дел од корисниците. Меѓу нив се ограничувањата кај камерата, вклучително и отсуството на телефото-објектив, како и апликациите од други производители што сè уште не се приспособени на новите димензии на екранот.

Според дел од рецензентите, кога е преклопен и се користи во помалиот формат, Дуо е помалку практичен за многу кратки секојдневни задачи што корисниците вообичаено ги извршуваат на стандардните ајфони. Поради тоа, неколку познати технолошки рецензенти не го препорачале уредот на повеќето купувачи на Епл.

„Беше многу забавно да го испробувам Дуо една недела, но имам чувство дека користев исклучително добро дотеран прототип, а не готов производ што би сакал да го купам и да го носам со себе секој ден“, напиша Џон Грубер, долгогодишен познавач на производите на Епл, во рецензија објавена на неговиот блог „Деринг фајрбол“.

Технолошкиот коментатор Маркес Браунли, познат како Ем-Кеј-Би-Ејч-Ди, во рецензија на Јутјуб оцени дека телефонот веројатно не е најдобриот избор за просечниот корисник, кој најчесто испраќа пораки, користи социјални мрежи и повремено пребарува на интернет.

„Но, ако 2.000 долари не ви претставуваат голем трошок и ви се допаѓа идејата, тогаш ова е многу забавен телефон, откако ќе го поминете периодот на приспособување и ќе се навикнете на тоа дека нема препознавање на лицето“, рече Браунли.

Ограничени залихи во повеќе земји

Ограничените залихи би можеле да ги разочараат купувачите што ќе чекаат пред продавниците за да го набават новиот уред.

Од Епл за Ројтерс изјавиле дека можноста за купување без претходна нарачка ќе зависи од земјата. Ограничени количества се очекуваат во САД, Австралија, Канада, Мексико и во голем дел од Велика Британија и Европа. Во Кина, Франција, Хонгконг, Индија и Јапонија, уредот ќе биде достапен само за купувачите што претходно го нарачале преку интернет.

Во Макао, специјалниот административен регион на Кина, каде што Дуо ќе може да се купи директно во продавниците, љубителите на Епл чекале со часови пред отворањето, покажуваат објавите на социјалните мрежи и медиумските извештаи.

Според Франциско Херонимо, потпретседател на компанијата за истражување на пазарот И-Ди-Си, телефоните на преклопување се присутни на пазарот со години, но нивното учество и понатаму е релативно мало во споредба со класичните паметни телефони.

„Влегувањето на Епл би можело да го приближи овој формат до значително поширока публика“, изјавил Херонимо.

И-Ди-Си очекува Епл во 2026 година да заземе 44 отсто од пазарот на телефони на преклопување според вредноста на продажбата, со удел од 31 отсто во вкупниот број продадени уреди.Според прогнозата на компанијата, во 2027 година Епл би можел да стане водечки производител во оваа категорија, и според вредноста на продажбата и според бројот на испорачани уреди.

Дали ајфон Дуо навистина ќе го прошири пазарот на телефони на преклопување или ќе остане скап уред за ограничен круг купувачи, ќе зависи и од тоа колку добро ќе се покаже во секојдневната употреба.