Од 1 септември во основното училиште „Димитар Македонски“ во Општина Аеродром ќе се воведе едносменска настава за учениците од шесто до деветто одделение.

Според новата организација, овие ученици ќе следат настава во прва смена, додека учениците од прво до трето одделение ќе бидат вклучени во целодневна настава.

Учениците од четврто и петто одделение ќе продолжат да ротираат во прва и втора смена.

Нов распоред на наставата од 1 септември

Од Општина Аеродром информираат дека новиот модел на организација на наставата треба да овозможи поквалитетен воспитно-образовен процес и подобри услови за учениците.

„Со воведувањето на едносменската настава се создаваат услови за поквалитетен воспитно-образовен процес, подобри резултати во учењето, поголема вклученост на учениците во спортски, културни и воннаставни активности, како и за поорганизирано извршување на училишните обврски со поддршка од наставниците“, велат од локалната самоуправа.

Оттаму додаваат дека овој модел овозможува постабилен дневен ритам за учениците и повеќе квалитетно време за семејството.

Едносменска настава веќе има и во „Александар Македонски“

Информацијата беше соопштена при увидот на градежните активности во училиштето „Димитар Македонски“.

Од Општина Аеродром потсетуваат дека претходно едносменска настава веќе била воспоставена и во основното училиште „Александар Македонски“.

Со ова, општината продолжува со постепено воведување нова организација на наставата во основните училишта, со цел подобри услови за учениците и наставниците.