Иако многумина мислат дека за раскошни рози е потребна градина, вистината е дека овие кралици на цвеќето одлично успеваат и во саксии на балкон или тераса. Доволна е само една богата саксија полна со цветови за целиот простор да изгледа поелегантно, потопло и полуксузно. Сепак, за розите во саксија да цветаат долго и здраво, потребни се неколку важни правила.
Не сите рози се подеднакво погодни за одгледување во саксии. За балкони и тераси најдобро успеваат пониски и покомпактни сорти со помал коренов систем. Особено практични се: флорибунда рози, мини рози, грмушести сорти како „Iceberg“ и „Bonica“, како и отпорните „Knock Out“ рози, познати по богатото цветање и лесното одржување.
Овие сорти полесно се прилагодуваат на ограничен простор и се поотпорни на болести.
Колку поголема саксија – толку подобро
Кај розите важи едноставно правило: поголема саксија значи поздраво и подолговечно растение. Малите саксии: брзо се сушат, го ограничуваат коренот и создаваат дополнителен стрес за растението во летните горештини.
На дното задолжително треба да има добра дренажа за да не се задржува вода, бидејќи коренот на розата не поднесува постојана влага. Најдобро е да се користи квалитетен супстрат збогатен со компост и перлит за подобра воздушност и задржување на хранливите материи.
Без сонце нема богато цветање
Розите обожаваат сонце. За обилно цветање им се потребни најмалку шест часа директна сончева светлина дневно. Најидеални се: јужни балкони, западни тераси и добро осветлени агли без постојана сенка.
Недостатокот на сонце најчесто резултира со помалку цветови и послабо растение.
Наводнувањето бара баланс
Розите во саксија имаат поголема потреба од вода отколку оние засадени во двор, но претераното полевање може сериозно да им наштети.
Најдобро е да се полеваат обилно, но само кога горниот слој на земјата ќе се исуши. Во лето саксиите брзо се загреваат, па важно е редовно да се проверува влажноста на почвата за коренот да не доживее стрес.
Прихраната е тајната за долготрајни цветови
Розите се растенија кои бараат хранлива почва и редовна прихрана. Во текот на пролетта и летото се препорачува: ѓубриво за рози или прихрана за цветни растенија. Без дополнителни хранливи материи, цветањето брзо слабее, а растението изгледа исцрпено.
Редовното отстранување на овенатите цветови е една од најважните навики за нега. Така растението не троши енергија на создавање семе, туку продолжува да формира нови пупки.
Во зима, саксијата треба да се премести на позаштитено место бидејќи коренот во саксија е почувствителен на мраз отколку кога розата е засадена директно во земја.
