Од печат излезе книгата „Дријади“ од Игор Анѓелков, како деветто издание во едицијата „И ете приказна“ на издавачката куќа „Или-Или“. Станува збор за тринаесетта книга на авторот, но воедно и за негово прво дело наменето за деца и млади читатели.
Во центарот на романот се три средношколки, три другарки кои по прославата на роденден тргнуваат на својот прв заеднички летен одмор на море. Наместо бурно летување, тие избираат мирен и, како што самите го замислуваат, „пензионерски“ одмор во соседството. Но токму таму почнуваат да се соочуваат со необични случки и ситуации на кои првично не им придаваат поголемо значење.
Како што приказната се развива, настаните постепено се згуснуваат, а пред нив почнува да се отвора поинаков свет од оној што го очекувале. Според најавата, романот умешно вметнува митолошки елементи во современ контекст, создавајќи приказна што ја поттикнува фантазијата и се чита со леснотија.
Авторот Игор Анѓелков вели дека во последната декада домашната литература за помладата публика нуди сериозни причини за оптимизам. Според него, „Дријади“ со својата непретенциозност се приклучува кон оние книги што можат да ѝ се приближат на возраста која, ако сега не воспостави однос со читањето, подоцна лесно може трајно да се оддалечи од литературата и од нејзиниот потенцијал да поттикне критичко размислување и оформување личен светоглед.
Анѓелков посочува и дека тринаесеттата книга, иако според суеверието често се врзува со лоша среќа, за него значи нешто сосема спротивно – отворање на нова врата и влез во нов свет во кој уживал додека ја пишувал. Според неговите зборови, „Дријади“ не е книга само за деца и млади, туку и за возрасни читатели кои и понатаму го негуваат „детето во себе“.
Со ова издание, „Или-Или“ продолжува да ја збогатува својата едиција „И ете приказна“, а домашната книжевна сцена добива уште едно дело што се обидува да воспостави жива врска со помладата читателска публика.
