Многу луѓе се жалат дека се чувствуваат уморни речиси секој ден, дури и кога мислат дека спијат доволно. Но, според лекарите, чувството на постојана исцрпеност не секогаш е поврзано со недостаток на сон и може да биде сигнал дека во организмот се случува нешто посериозно.

Еден лекар откри дека кога пациент ќе му каже дека е постојано уморен, првото нешто што го прашува е: „Колку долго трае тоа?“

Токму времетраењето на симптомите им помага на лекарите да проценат дали станува збор за привремена состојба предизвикана од стрес, напорен период или недоволно одмор, или пак за проблем што бара подетални испитувања. Доколку заморот трае со недели или месеци и почнува да влијае врз секојдневниот живот, тоа може да укажува на подлабока здравствена причина. 

Експертите објаснуваат дека постои разлика помеѓу поспаност и замор. Поспаноста претставува потреба за сон и намалена будност, додека заморот е недостаток на енергија што може да биде предизвикан од повеќе фактори, дури и кога лицето спие доволно. 

Меѓу најчестите причини за хроничен замор се анемијата, хормоналните промени, вирусните и бактериските инфекции, нарушувањата на спиењето, како и одредени срцеви заболувања. Лекарите посочуваат дека кај жените заморот може да биде поврзан и со менструалниот циклус, перименопаузата или недостаток на железо. 

Специјалистите советуваат лекарска помош да се побара доколку заморот трае повеќе од две недели, ако ја намалува способноста за работа, физичка активност или извршување на секојдневните обврски. Во такви случаи најчесто се прават лабораториски анализи за да се утврди дали постои скриена здравствена состојба. 

Освен здравствените проблеми, значајна улога имаат и животните навики. Нередовниот сон, стресот, недоволната физичка активност и лошата исхрана можат значително да придонесат за чувството на исцрпеност. Според експертите, организмот произведува енергија преку сложени процеси во клетките, а за тоа му се потребни соодветни хранливи материи, витамини и минерали. 

Затоа, ако постојано се чувствувате уморно, не е доволно само да спиете повеќе. Важно е да се открие причината за заморот, а токму одговорот на едноставното прашање „колку долго трае?“ често е првиот чекор кон правилната дијагноза.