По драматичните натпревари од претходниот ден, денес продолжува нокаут-фазата на Светското првенство 2026, кога ќе бидат познати уште три репрезентации што ќе обезбедат место во осминафиналето.
Досега се познати следните осминафинални двојки:
- Франција – Парагвај
- Канада – Мароко
- Бразил – Норвешка
- Мексико – Англија
- Белгија – САД
Шпанија и Австрија го отвораат денот
Програмата започнува во 21 часот со натпреварот меѓу Шпанија и Австрија. Победникот од овој дуел во осминафиналето ќе се сретне со победникот од натпреварот меѓу Хрватска и Португалија, кој е закажан за 1 часот по полноќ.
Последниот натпревар на денот ќе се одигра во 5 часот наутро, кога ќе се соочат Швајцарија и Алжир.
Пулишиќ: Игравме како вистински тим
По победата од 2:0 над Босна и Херцеговина, американскиот капитен Кристијан Пулишиќ ја пофали играта на својот тим.
„Игравме како вистински тим. Во првото полувреме доминиравме и можевме да постигнеме повеќе голови. Во второто полувреме вложивме огромен напор да ја сочуваме предноста иако останавме со играч помалку. Одиме понатаму со нова енергија. Според мене, Балогун не заслужи црвен картон“, изјави Пулишиќ.
Ибрахимовиќ: Ова е лекција за сите
Легендарниот Златан Ибрахимовиќ смета дека победата на САД е пример како треба да реагира еден тим во тешки моменти.
„Токму затоа фудбалот е најголемиот спорт на светот. Американците имаа многу причини да се распаднат – им беа поништени два гола, останаа со играч помалку, но наместо тоа станаа уште посилни. Повеќето репрезентации ќе ја изгубеа концентрацијата во таква ситуација“, рече Ибрахимовиќ.
Барбарез и Џеко со емотивни пораки
И покрај елиминацијата, селекторот на Босна и Херцеговина, Сергеј Барбарез, не ги криеше емоциите.
„Кога ќе загубите, секогаш чувствувате дека нешто недостасувало. Имавме контрола врз натпреварот, но примивме гол по наша грешка. Во второто полувреме се обидовме со сè што можевме. Играчите заслужуваат само пофалби“, изјави Барбарез, кој по последниот судиски свиреж се расплака.
Капитенот Един Џеко порача дека репрезентацијата има причина за гордост.
„Дадовме сè од себе. Жал ни е што си одиме дома, но треба да бидеме горди на сè што направивме. Вториот примен гол нè скрши и потоа беше многу тешко да се вратиме во натпреварот“, изјави искусниот напаѓач.
