Шпанскиот град Сеута се наоѓа во длабока хуманитарна криза откако стотици деца и млади мигранти пристигнаа пливајќи од Мароко, оставајќи ги локалните власти без капацитет да им обезбедат основно сместување. Градот побара итна помош од централната влада во Мадрид и од Европската Унија, додека десетици малолетници без родителска грижа се принудени да спијат на отворено.

Локалните власти во Сеута соопштија дека капацитетите за прифаќање малолетници се надминати за повеќе од четири пати од предвидениот максимум. Во градот во моментов се сместени над 500 деца и тинејџери кои преминалe преку границата без придружба на возрасни. Меѓу нив има и деца на десетгодишна возраст кои сами лутаат низ градските улици или се обидуваат да се скријат во пристаништето за да се качат на фериботите кон континентална Шпанија.

Бранот мигранти беше поттикнат од густата магла и лошите временски услови на границата, кои многумина ги искористија за да ги заобиколат граничните контроли со пливање околу карпестите брегови. Шпанската полиција и крајбрежната стража секојдневно спасуваат десетици млади кои го ризикуваат животот во студените морски струи, користејќи само импровизирани помагала за пливање.

Шпанскиот премиер и министерот за внатрешни работи најавија планови за распределба на малолетниците во други автономи региони ширум Шпанија за да се намали притисокот врз Сеута. Меѓутоа, некои регионални влади покажуваат отпор кон прифаќање нови групи мигранти. Хуманитарните организации предупредуваат дека доцнењето на политичкиот договор директно ги загрозува правата и безбедноста на децата.