Четврт век откако за првпат беше прикажан и ја освои светската кинематографија, култниот филм „Ничија земја“ на режисерот Данис Тановиќ се враќа на Сараево Филм Фестивал.

Едно од најзначајните остварувања во босанскохерцеговскиот филм ќе биде прикажано во програмата Open Air, со што свечено ќе биде затворено 32-то издание на фестивалот.

Оваа фестивалска проекција воедно ќе биде и прво прикажување на дигитално реставрираната верзија на филмот во 4K резолуција, која неодамна ја обработи продукцијата Studiocanal користејќи го оригиналниот 35 милиметарски филмски негатив.

Публиката ќе има единствена можност повторно да го доживее овој филмски klasik пред повеќе од 3.000 посетители во најголемата фестивалска локација, Летното кино Coca-Cola.

Светската премиера на „Ничија земја“ се одржа на 12 мај 2001 година во Кан, каде што освои награда за најдобро сценарио, а веќе во август истата година ја освои и наградата од публиката во Сараево.

Меѓународниот успех го достигна својот врв на 24 март 2002 година, кога филмот го освои престижниот Оскар за најдобар филм од неанглиско говорно подрачје.

Настанат од искуствата и реалноста на овие простори, филмот преку универзална приказна за војната, апсурдот и човечноста ги освои светските критичари и на регионот му донесе едно од најважните културни признанија.

На свечената проекција во Сараево се очекува доаѓањето на филмската екипа предводена од режисерот Данис Тановиќ, како и актерите Бранко Ѓуриќ, Рене Биторајац, Филип Шоваговиќ и многу други.

Овогодинешното издание на Сараево Филм Фестивал започнува на 14 август, а ќе заврши на 21 август со проекцијата на овој филмски бисер.