Високиот крвен притисок со причина се нарекува „тивок убиец“ – често се појавува без јасно забележливи симптоми.

Кардиолозите препорачуваат ограничување на внесувањето сол и редовна физичка активност за одржување здрав крвен притисок, пренесува „EatingWell“.

„Наместо да чекате да се појават предупредувачки знаци, препорачувам редовно да го мерите крвниот притисок дома, во аптека или во ординацијата на матичниот лекар“, вели кардиологот Рохит Вупулури.

Сепак, кардиолозите посочуваат неколку помалку познати знаци што би можеле да укажуваат на висок крвен притисок.

1. Често станувате во текот на ноќта за да уринирате

Будењето повеќепати во текот на ноќта поради потребата за уринирање лесно може да се занемари, но истражувањата го поврзуваат ноќното уринирање со високиот крвен притисок и чувствителноста на сол. Станува збор за еден од знаците што често остануваат незабележани.

Истражувањата покажуваат дека постои поврзаност меѓу станувањето за уринирање два или повеќепати во текот на ноќта и хипертензијата.

Истражувачите го објаснуваат тоа со две главни причини – промените во работата на бубрезите и задржувањето течности. Високиот крвен притисок ги оптоварува бубрезите и го менува начинот на кој тие ги обработуваат течностите. Исто така, може да предизвика насобирање течности во екстремитетите, кои по легнувањето повторно се враќаат во крвотокот. И двете состојби можат да предизвикаат потреба за уринирање во текот на ноќта.

2. Забележувате промени во видот

Промените на видот можат да бидат последица на различни состојби, како инфекција на окото, катаракта, глауком или мигрена. Во некои случаи, тие можат да бидат и знак на висок крвен притисок.

„Луѓето честопати новото заматување на видот или проблемите со фокусирањето ги припишуваат на потребата од очила, но високиот притисок ги оштетува ситните и чувствителни крвни садови во мрежницата“, вели доктор Надим Гелу.

Високиот крвен притисок може да го попречи и протокот на крв до очите и да ги оштети не само крвните садови, туку и очните нерви.

„Овие крвни садови се меѓу ретките што лекарот може директно да ги види, поради што прегледот на очите понекогаш може да укаже на висок крвен притисок уште пред да се појават други знаци“, додава Гелу.

3. Имате проблеми со спиењето

Високиот крвен притисок може да влијае врз лачењето мелатонин – хормонот што предизвикува поспаност во текот на ноќта. Поврзан е и со проблеми со спиењето, како несоница и апнеја при спиење.

Лошиот сон истовремено претставува и фактор на ризик за појава на висок крвен притисок. Ако не спиете добро, телото и умот се изложени на поголем стрес, што може да го зголеми крвниот притисок.

„Апнејата при спиење предизвикува прекини на дишењето, кои доведуваат до намалено ниво на кислород и зголемено оптоварување на организмот“, вели Вупулури. Тоа исто така го зголемува ризикот од висок крвен притисок.

Хипертензијата не е единствената причина за проблемите со спиењето, но може да биде знак што лесно се превидува.

4. Побрзо останувате без здив

Дали тешко се опоравувате од недостигот на воздух по искачување скали? Во некои случаи, тоа може да биде знак на белодробна хипертензија, односно висок крвен притисок во белите дробови.

„Кога крвниот притисок останува висок, срцето мора да работи посилно за да ја испумпува крвта низ телото. Со текот на времето срцевиот мускул може да стане крут и задебелен, поради што секојдневните активности, како искачувањето скали, можат да станат потешки отколку што би требало“, објаснува Гелу.

Многумина ова едноставно го припишуваат на стареењето или на послабата физичка кондиција, вели тој, но сепак вреди да го проверите крвниот притисок за да бидете сигурни дека се наоѓа во здрави граници.

Како да одржувате здрав крвен притисок

Единствениот сигурен начин да дознаете дали имате висок крвен притисок е да го измерите. Тоа можете да го направите со домашен апарат, во аптека или кај лекар.

Без оглед на тоа дали измерените вредности се покачени, постојат неколку начини со кои можете да придонесете за одржување здрав крвен притисок:

• Ограничете го внесувањето сол. Исхраната богата со сол доведува до задржување поголемо количество течности во организмот и може да го зголеми крвниот притисок. Се препорачува читање на декларациите на прехранбените производи и почесто подготвување храна дома.
• Внесувајте повеќе калиум. Доволното внесување калиум е подеднакво важно како и ограничувањето на солта. Калиумот му помага на организмот да го исфрли вишокот натриум и ги опушта ѕидовите на крвните садови. Добри извори се овошјето, зеленчукот, морските плодови и млечните производи.
• Бидете физички активни. Американското здружение за срце ја наведува физичката активност како важен дел од контролирањето на високиот крвен притисок. Се препорачуваат најмалку 150 минути аеробна активност со умерен интензитет неделно, заедно со најмалку два дена вежби за сила.
• Следете ги вредностите. Редовното мерење на крвниот притисок дома може вам и на вашиот лекар да ви покаже дали вредностите се менуваат и да помогне навреме да се забележат евентуалните загрижувачки промени.