Ретроспективната изложба „Благоја Маневски: 40 години творештво“ ќе биде отворена на 23 септември, во 20 часот, во Музејот на современата уметност – Скопје.
Изложбата го претставува творечкиот пат на Благоја Маневски од 1985 до 2025 година, четиридецениски период обележан со уметничко истражување, експериментирање и постојано преиспитување на границите на уметничкото дело.
Посетителите ќе имаат можност да го проследат развојот на Маневски, почнувајќи од неговите рани сликарски искуства и апстрактни истражувања, преку создавањето објекти и просторни интервенции, до концептуалните инсталации и перформативните форми.
Во неговото творештво се испреплетуваат сликарството, цртежот, фотографијата, објектот, инсталацијата, амбиентот и хепенингот. Преку овие различни медиуми, Маневски развива препознатлив визуелен јазик во кој традицијата, просторот, материјата и личното искуство се наоѓаат во постојан дијалог.
Неговата работа ја одбележуваат силна авторска позиција и континуирана потреба да се преиспитува што сè може да претставува уметничко дело. Во неа се нагласуваат енергијата на раката, телото и материјата, како тивок, но моќен отпор кон забрзувањето и технолошкото посредување во современата визуелна култура.
Благоја Маневски е роден во 1957 година и во текот на својата кариера учествувал на значајни национални и меѓународни уметнички манифестации, меѓу кои Југословенската документа, Биеналето на млади југословенски уметници во Риека и Венециското биенале. Со својата повеќедецениска работа тој зазема значајно место во развојот на македонската современа уметност.
Кураторки на изложбата се Лилјана Неделковска и Натали Рајчиновска-Павлеска, додека координатор на проектот е Благоја Варошанец.
Во рамките на изложбата ќе биде објавено и обемно монографско издание посветено на Маневски, кое содржи авторски текстови од Лилјана Неделковска, Натали Рајчиновска-Павлеска, Бојан Иванов и Валентино Димитровски.
Изложбата е дел од годишната програма на Музејот на современата уметност – Скопје, поддржана од Министерството за култура и туризам.
