Бројот на загинати во двата силни земјотреси што ја погодија Венецуела продолжува да расте. Според најновите официјални информации, досега се потврдени 920 жртви, повеќе од 4.300 лица се повредени, а речиси 50.000 луѓе сè уште се водат како исчезнати. Спасувачките екипи неуморно ги пребаруваат урнатините во обид да пронајдат преживеани. Според властите, од најтешко погодената крајбрежна област Ла Гуаира досега се спасени 243 лица, додека стотици објекти се целосно уништени или сериозно оштетени.
Претседателот на Националното собрание, Хорхе Родригез, соопшти дека се оштетени најмалку 383 згради, меѓу кои 13 болници и 25 трговски центри. Дополнително, повеќе од 1.000 инфраструктурни објекти претрпеле различен степен на оштетување.
Меѓу најтрогателните приказни е онаа за жена која загинала додека со своето тело ја заштитувала својата ќерка при уривањето на зградата. Детето преживеало, а трагедијата предизвика силни реакции во јавноста. Во друга драматична спасувачка акција, жена родила под урнатините, по што таа и новороденчето биле извлечени од спасувачите. Жителите на погодените подрачја велат дека градовите изгледаат како воена зона. Илјадници луѓе ноќите ги минуваат на улиците, во шатори или на душеци поставени на отворено, стравувајќи да се вратат во оштетените домови поради опасност од нови потреси.
Владата започна проверки на сите оштетени објекти за да утврди дали се безбедни за живеење, додека Министерството за туризам врши проценка на штетите врз хотелите и туристичката инфраструктура. Во меѓувреме, Обединетите нации и меѓународните хуманитарни организации упатија апел за итна глобална помош, предупредувајќи дека кризата може дополнително да се продлабочи доколку погоденото население не добие брза хуманитарна поддршка.
Дополнителни контроверзии предизвика одлуката на градоначалникот на општината Кампо Елијас во државата Мерида, кој нареди единствено Цивилната заштита да биде надлежна за собирање и дистрибуција на хуманитарна помош. Во исто време, дел од граѓаните и политичките организации тврдат дека полицијата задржала камиони со донации наменети за настраданите
