Фудбалерите на Бразил го освоија првото место во групата Ц на Светско првенство 2026, откако во последното коло во Мајами ја совладаа Шкотска со 3:0. Бразилците доминираа во текот на целиот натпревар, а главната ѕвезда беше Винисиус, кој постигна два гола (7. и 45+3. минута). Третиот погодок го додаде Матеус Куња во 60. минута.

Во истата група, Мароко обезбеди пласман во осминафинале по победата над Хаити со 4:2 во Атланта. Мароканците се враќаа од резултатски минус и со головите на Ацраф Хакими, Исмаел Саибари, Софијан Рахими и Гесиме Јасине стигнаа до важен триумф. Бразил ја заврши групата со седум бодови и гол-разлика 7:1, додека Мароко исто така има седум бодови, но полоша гол-разлика, па заврши втор. Шкотска со три бодови останува трета и ќе чека развој во останатите групи за евентуален пласман понатаму, додека Хаити е без бодови.

Во групата А, Мексико го потврди првото место со победа од 3:0 против Чешка, со што ја заврши групната фаза со три победи од три натпревари – историски успех за националниот тим.

Мексиканците претходно ги совладаа Јужна Африка (2:0) и Јужна Кореја (1:0), а против Чешка ја потврдија доминацијата со голови во второто полувреме. Натпреварот го одбележа и настапот на голманот Гиљермо Очоа, кој влезе во игра во 78. минута и настапи на своето шесто Светско првенство, што го прави еден од најискусните играчи во историјата на турнирот.

Во истата група, Јужна Африка приреди големо изненадување и со победа од 1:0 над Јужна Кореја обезбеди историски пласман во осминафиналето. Стрелец на единствениот гол беше Тапело Масеко во 63. минута. Ова е прв пат во историјата Јужна Африка да ја мине групната фаза на едно Светско првенство, а во осминафиналето ќе се соочи со Канада.