Банкарскиот гигант Standard Chartered објави план за укинување на повеќе од 15% од административните и помошните работни места, односно околу 7.800 позиции, до 2030 година, како дел од поширок процес на дигитална трансформација и примена на вештачка интелигенција. Компанијата, со седиште во Велика Британија, наведува дека дел од погодените вработени ќе бидат прераспределени на други позиции, но значителен дел од работните места ќе бидат трајно укинати.

Од банката објаснуваат дека сè поголемата примена на автоматизација, напредна аналитика и вештачка интелигенција има за цел да ги поедностави процесите, да го подобри донесувањето одлуки и да ја зголеми ефикасноста во работењето.

Овој потег е дел од стратегијата на извршниот директор Бил Винтерс, кој ја насочува банката кон посилно присуство на пазарите во Азија и Африка.

Глобален тренд на отпуштања во финансискиот и технолошкиот сектор

Standard Chartered не е единствена финансиска институција што го намалува бројот на вработени поради воведување на вештачка интелигенција. Претходно, DBS Bank најави укинување на околу 4.000 договорни и привремени работни места во следните три години.

Слични мерки преземаат и големи технолошки компании, кои вложуваат милијарди во развој на AI системи. Меѓу нив е и Meta, која најави значајно намалување на бројот на вработени, како и други глобални корпорации како Amazon и Oracle.

Експертите предупредуваат дека најголем ризик од ваквиот тренд ќе имаат работните позиции во административниот, технолошкиот и почетниот професионален сектор, каде вештачката интелигенција сè почесто ги заменува човечките задачи.

Во меѓувреме, компаниите нагласуваат дека паралелно со отпуштањата се отвораат нови позиции во области поврзани со развој, управување и надзор на AI системи, што укажува на долгорочна трансформација на пазарот на труд.