Актерката Блејк Лајвли побара од судот Justin Baldoni да ѝ исплати 8.035.040,88 долари за адвокатски и судски трошоци, откако претходно судот утврди дека има право на надомест за трошоците направени во одбраната од неговата неуспешна тужба за клевета. 

Според судските документи, побарувањето опфаќа околу 7,5 милиони долари за адвокатски хонорари и повеќе од 539.000 долари за судски и процесни трошоци поврзани со случајот. Нејзиниот правен тим наведува дека станува збор за исклучително сложен и медиумски експониран процес кој барал обемна правна подготовка. 

Барањето следува по одлуката на судијата Луис Лиман од 12 јуни, со која беше утврдено дека Лајвли има право да бара надомест на трошоците согласно закон во Калифорнија што ги штити лицата кои пријавуваат сексуално вознемирување од одмазднички тужби за клевета. Истовремено, судот го одби нејзиното барање за казнени и тројни оштети. 

Правниот спор започна по несогласувањата околу снимањето на филмот It Ends With Us, а двете страни меѓусебно поднесоа повеќе тужби. Иако во мај беше постигната поширока спогодба, прашањето за адвокатските трошоци остана отворено и ќе биде предмет на дополнителна судска постапка. Тимот на Балдони смета дека бараниот износ е неоправдан и најави дека ќе одговори во рокот определен од судот.